Оюутны сургалтын төлбөрийн хөнгөлөлт буюу тухайн жилд төлсөн төлбөрийн 10 хувийг буцаан авах талаар дэлгэрэнгүй мэдээллийг Чингэлтэй дүүргийн татварын хэлтсийн мэргэжилтнээс тодрууллаа.
-Сургалтын төлбөрийн хөнгөлөлтөд хамрагдах хуулийн хугацаа хэднийг хүртэл вэ. Бүх материалаа цахимаар бүрдүүлэх боломжтой юу?
-Тайлагнах хуулийн хугацаа 2021 оны хоёрдугаар сарын 15-ныг хүртэл байгаа. ХХОАТ-ын хуулийн дагуу хөнгөлөлтөд хамрагдах иргэн нь татварын албаны etax.mta.mn цахим хуудсанд нэвтэрч ХХОАТ-ын тайлан /ТТ-06/, хүсэлтийн хамт 2021 оны 2 дугаар сарын 15-ны дотор багтааж, цахимаар ирүүлнэ гэсэн үг. Сургалтын төлбөрийн хөнгөлөлтөд хамрагдах иргэн хувь хүний орлогын албан татварын тайлангаа цахимаар ирүүлэхдээ дараах материалыг бүрдүүлсэн байна.Үүнд:
- Сургуулийн тодорхойлолт /файл/
- Сургалтын төлбөр төлсөн цахим төлбөрийн баримтын дугаар /Гадаад сургалтын төлбөр төлсөн баримтын файл/
Тэгэхээр бүрдүүлэх материалын хувьд оюутнууд сургалтын албанаасаа дээрх хоёр материалыг файлаар авахад л хангалттай гэж ойлгож болно.
-Эцэг эх нь хувийн байгууллагат ажилладаг, хувиараа хөдөлмөр эрхэлдэг бол буцаан олголт авч болох уу?
-Хувийн байгууллагат ажилладаг ч гэсэн хувь хүний орлогын албан татвар төлдөг бол буцаан олголт авах боломжтой. Хэрэв төлдөггүй бол авах боломжгүй.
-“Оюутны хөгжлийн зээл”-ээр сурч байгаа оюутнуудад энэ хөнгөлөлт хамаарах уу?
-Хувь хүн өөрөө төлөөгүй учир оюутны зээлээр сурсан оюутнуудын хувьд хамрагдах боломжгүй гэсэн үг.
-Буцаан олголтын мөнгө нь хэзээ орох вэ?
-Тухайн жилд тайлагнасан хугацаанаасаа хамаарч I-IV улирал гэж хуваагдаж, материалаа бүрдүүлж өгсөн хугацаанаас хамаарч янз бүр олгогддог. Өмнөх жилийн тухайд хамгийн сүүлийн буцаан олголт долдугаар сар гэхэд орж дууссан.
-Өмнө аваагүй төлбөрийн буцаан олголтоо нөхөж авч болох уу?
-Зөвхөн тухайн ондоо тайлагнаж, олгогдох зохицуулалтай учраас өмнөх жилүүдийг нөхөн авч болохгүй.
-Тайлант хугацаанаас хоцорвол яах вэ. Материалаа нөхөж өгч болох уу?
-Хуулийн хугацаанаас хоцорсон тохиолдолд нөхөж авах боломжгүй байдаг учраас өмнө орон сууц, сургалтын төлбөрийн хөнгөлөлтөд хамрагдах хүсэлтэй иргэд 2021 оны хоёрдугаар сарын 15-наас цахимаар материалаа бүрдүүлж өгөх ёстойг анхаарна уу.
Ч.Биндэръяа