Засгийн газраас Улаанбаатар-Дархан чиглэлийн 204 км авто замыг дөрвөн эгнээ бүхий авто зам болгон өргөтгөж, шинэчлэх шийдвэрийг гаргаж, анхны төлөвлөгөө ёсоор зам засварын ажлыг 2019 оны арваннэгдүгээр сард дуусгах товтой байв.
Товлосон хугацаанаас хойш бүтэн жил өнгөрсөн ч ихээхэн хэл ам дагуулсан уг замын эхний хэсгийг буюу автозамын зөвхөн нэг, гурав, тавдугаар хэсгийг маргааш нээхээр болжээ.
Харин үлдсэн хоёр, дөрөвдүгээр хэсгийн замыг ажлыг ирэх хавар үргэлжлүүлэхээр болж байна.
Хятадын компани замын ажлаас гэнэт татгалзсаныг хахуультай холбон тайлбарлаж байна
Ийн хэсэгчлэн ашиглалтад оруулж байгаагийн учир нь, хоёр, дөрөвдүгээр хэсгийн замыг ажлыг хийхээр тендерт шалгарсан БНХАУ-ын “Чайна Стэйт Шинжиан Констракшн Инженеринг групп” гэнэт ажиллахаас эрс татгалзан техник, тоног төхөөрөмжөө хуу хамаад алга болсон билээ. Тэд нутагт нь цар тахал гарсантай холбоотойгоор ажлаа зогсоож байгаагаа мэдэгдсэн гэх боловч ийн хүч хаяж ирчихээд гэнэт буцсан шалтгааныг манай түшмэд хээл, хахууль нэхсэнтэй холбоотой хэмээн тайлбарлагсад ч байна. Ямартай ч, Хар модот давааны араас Урьхан хүртэлх 45.5 км, Сүмбэрийн уулзвараас Цайдамын хөндий хүртэлх 45.08 км замын ажлыг хийхээр тендерт ялсан компанийн хийхээр төлөвлөж байсан хоёр, дөрөвдүгээр хэсгийн замын ажил ийнхүү зогсонги байдалд орсон юм. Тиймээс гэрээг цуцалж, дахин сонгон шалгаруулалт зарлахаар болжээ.