Монгол Улсын Засгийн газрын өнөөдрийн хуралдаанаар Биеийн тамир, спортын улсын хорооны даргаар Ц.Шаравжамцыг томилжээ.
Ерөнхий сайдын эрхлэх асуудлын хүрээнд Засгийн газрын тохируулагч агентлаг Биеийн тамир, спортын улсын хороог байгуулсан.
Ажилд томилох тухай тогтоолыг ЗГХЭГ-ын салбарын удирдлага, зохицуулалтын газрын дарга Ш.Мөнхцэрэн уншиж танилцуулан “Монгол улсын засгийн газар биеийн тамир, спортын асуудалд онцгой анхаарч, та бүхэнд маш их итгэл хүлээлгэж байгаа. Аль нэг салбарын хавсарга биш бие даасан байдлаар ажиллах учраас Үндэсний хэмжээнд бодлогоо зангидаж, яамны түвшинд ажиллахаар болж байна. Монгол улсын Ерөнхий сайд олимпоос тодорхой үр дүн, мөн нийтийн биеийн тамирын чиглэлд томоохон ахиц гарна хэмээн итгэл хүлээлгэж байгаагаа онцгойлон тэмдэглэж хэлсэн” гэж Биеийн тамир, спортын газраас мэдээллээ.