Шүүхийн шийдвэр гүйцэтгэх ерөнхий газрын харьяа 429 дүгээр хаалттай хорих анги- Хоригдлуудыг нийгэмшүүлэх ажлын хүрээнд анх удаа керамик урлалын сургалт явуулж эхэлжээ. Сургалтаар хоригдлууд сургагч багшийн заасан арга техникийн дагуу шавраа бэлтгэн, гар техникийн аргуудад суралцаж, өөр өөрийн гаргасан зургийн дагуу бүтээлээ урлаж эхэлсэн байна.
Сургалтын ач холбогдлын талаар албаныхан хоригдлуудын зан байдал, засрал хүмүүжилд эерэгээр нөлөөлөхөөс гадна суллагдан гараад, эзэмшсэн мэргэжлээрээ ажил хөдөлмөр эрхлэн, сайхан амьдрах боломж бүрдэж байгаа талаар онцоллоо.
Сургалтад тус хорих ангид ял эдэлж байгаа хоригдлуудаас гарын ур дүйтэй, зураг зурах болон сийлбэр хийх авьяастай 6 хоригдлыг хамруулсан байна. Сургалтын арга хэлбэрийн хувьд 30 хувь нь онолын мэдлэг олгох, 70 хувь нь практик дадлага олгох хэлбэрээр явагдаж байна.
Д.СУВД-ЭРДЭНЭ