ЭМЯ-наас ээлжит мэдээллээ хийлээ. Мэдээллийн үеэр ХӨСҮТ-ийн ерөнхий захирал Д.Нямхүү, “2020 оны VII сарын 17-нд ХӨСҮТ, Дархан-Уул аймгийн, ЗӨСҮТ-ийн лабораторид нийт 555 хүний сорьцод шинжилгээ хийхэд 530-д нь коронавирус илрээгүй. Харин 25 хүнээс коронавирусийн халдвар илэрлээ. Эдгээр хүмүүс нь Афганистанаас ирсэн дайчид.
Ингэснээр Монгол Улсад коронавирусийн халдварын батлагдсан тохиолдол 287 боллоо. Эмчилгээнд 78 хүн байна. ХӨСҮТ-д 140 хүн эмчилгээ, тандалтад байна. 2020 оны долдугаар сарын 15-нд Сөүл-Улаанбаатарын онгоцоор ирсэн 182 хүний сорьцоос коронавирус илрээгүй. Эх орон руугаа буцаж байгаа БНХАУ-ын 240 иргэнээс илрээгүй. Алтанбулагийн боомтоор орж ирсэн ачаа тээврийн 23 жолоочоос илрээгүй. Сэлэнгэ аймагт тусгаарлагдсан 2 хүнээс илрээгүй. Тандалтын зорилгоор хийсэн 9 сорьцоос илрээгүй. /Дорноговь аймгийн Замын-Үүд сумын нэгсэн эмнэлэг, Баянгол дүүргийн нэгдсэн эмнэлгээс сорьцийг сонгон авсан. ХӨСҮТ-д тусгаарлагдсан 28 хүний давтан шинжилгээнээс коронавирус илрээгүй” гэлээ.