Тавдугаар сарын 22-ны өдөр Үндэсний их баяр наадмыг зохион байгуулах хороо хуралдаж, Үндэсний их баяр наадмаа цаг үеийн байдал, шинэ нөхцөлд тохируулан зохион байгуулах нь зүйтэй гэж шийдвэрлэсэн.
Үндэсний их баяр наадмыг зохион байгуулах хорооны гишүүд түүх соёл, уламжлалын Үндэсний их баяр наадмаа тэмдэглэж, олон сар хорио цээрийн дэглэмд буй ард иргэдээ хүндэтгэж, сэтгэл зүйн дэмжлэг үзүүлж, уламжлалаа тасалдуулахгүй байх нь зүйтэй гэж үзсэн юм. Иргэдийн бөөгнөрөл, цугларал үүсгэлгүй, халдвар хамгааллын дэглэмийг сайтар мөрдөн, наадмаа цомхон зохион байгуулах нь зөв хэмээн шийдвэрлэсэн.
Наадмаар үзэгчид цуглахгүй бөх барилдаж, хурдан морь уралдаж, сур болон шагайн харвааны тэмцээн зохион байгуулагдах юм. Мөн наадмын нээлт, хүндэтгэлийн тоглолт ч болно.
Жил бүрийн өдийд л баярын уур амьсгал аль хэдийнэ орчихсон, наадмын тухай гэрэлт дурсамж амнаас ам дамжин хөвөрч байдаг үе. Бөхчүүдийнх нь эр бяр жагсаж, хүүхдийн гийнгоон дуу хөдөө цайдамд цуурайтаад наадам дөхсөн өдрүүд даанч сайхан. Энэ жилийн тухайд цаг үеийн нөхцөл байдлаас шалтгаалаад баярын уур амьсгал хараахан ороогүй байна.
Өнөө цагт ид сайн барилдаж буй хүчит бөхчүүдийн баяр наадмын талаарх байр суурийг хүргэе.
Улсын аварга Ч.Санжаадамба: Төрийн шийдвэрийг л хүндэтгэж үзнэ
–Үндэсний их баяр наадмыг зохион байгуулах хорооны гишүүд баяр наадмыг халдвар хамгааллын дэглэм сахиж зохион байгуулах нь зөв гэж үзжээ. Энэ тал та ямар байр суурьтай байна вэ?
-Хамгийн нэгдүгээрт төр засгийн шийдвэрийг хүндэтгэж үзнэ. Улсын онцгой комисс, Эрүүл мэндийн яам зөв зохион байгуулалттай ажиллаж халдварыг дотооддоо алдсангүй. Нэгдүгээр сараас хойш заалны барилдаан зохион байгуулагдаагүй. Архангай аймгийн “Бөх билэгт” дэвжээний бөхчүүдийн тухайд төрийн шийдвэрийг хүндэтгэж зааланд цуглаж бэлтгэл сургуулилт хийсэнгүй. Бусад бөхчүүдийн ч бэлтгэл сургуулилт жигдрээгүй байгаа болов уу.
–Өнгөрсөн сард спортын заал танхимыг нээх шийдвэр гаргасан. Монгол наадам ч болох нь шиг байна. Таны хувьд наадмын бэлтгэлээ хэрхэн базааж байна вэ?
-Спорт заал фитнесс клубүүдийг нээсэн. Хүн сийрэг үед нь очиж хөлсөө гаргаад л явж байна. Гол нь аюулгүй байдлаа хангаад наадмаа хийвэл хаа хаанаа л хэрэгтэй байх. Үзэгчид ч хүлээж л байгаа байх.
Улсын гарьд Б.Гончигдамба: Халдвар хамгааллын дэглэмсахиад наадмаа зохион байгуулаасай
–Үндэсний их баяр наадмыг зохион байгуулах шийдвэр гаргажээ. Таны зүгээс ямар байр суурьтай байна вэ?
-Наадам болох болохгүй талаар тодорхой мэдээлэл одоогоор надад алга. Хувьдаа бол халдвар хамгааллын дэглэм сахиад наадмаа зохион байгуулаасай гэж хүсч байна. Бөхчүүд ч наадам болоосой л гэсэн байр суурьтай байгаа. Тусгаар тогтнол түүхэн уламжлалаа бодсон ч олон жил тэмдэглэж ирсэн баяр наадмаа цомхон хийхэд болохгүй зүйл байхгүй болов уу. Гадны орнуудад спортын уралдаан тэмцээн явагдаад эхэлсэн байна лээ.
-“даян” дэвжээний бөхчүүд баяр наадмын бэлтгэл сургуулилтаа хэрхэн базааж байна вэ?
-Саяхнаас цөөхөн, цөөхнөөрөө барилдааны бэлтгэл хийгээд эхэлсэн. Цол амжилтаа ахиулах өсөх ирээдүйтэй залуус “Даян” дэвжээнд олон бий.
-Таны хувьд өнгөрсөн жилийн наадмаар их шөвөгт шалгарч цол ахих бүрэн бололцоотойгоо илтгэсэн. Өнөө жилийн тухайд бэлтгэл хийж амжив уу?
-Миний хувьд өнгөрсөн өвөл бэлтгэл хийж чадаагүй. Саяхнаас л зааланд ганц нэг бэлтгэл хийж эхлээд байна. Бөх хүний оргил үед цөөн наадам тохиодог. Энэ жилийн тухайд уламжлалаа хадгалж монгол наадам болдгоороо болно гэж найдаж байна.
-Сая зааланд үзэгчгүй барилдаан зохион байгуулаад орлогыг нь улсын онцгой комисс, эрүүл мэндийн яаманд хандивлаж байна лээ. үүнийг та хэрхэн харж байна вэ?
-Эхний удаад туршилт маягаар зохион байгуулсан. Амжилттай болсон гэж хувьдаа үзэж байна. Цаашдаа ийм барилдаан зохион байгуулаад орлогыг нь сайн үйлсийн аянд зарцуулаад явбал зөв гэж үзэж байна.
Улсын гарьд Ө.Бат–Орших: Наадамзөвхөн бөхчүүд, уяач, сур харваачдын баяр цэнгэл биш. Түүхийн хувьд өндөр ач холбогдолтой зүйл
-Иргэдийн бөөгнөрөл, цугларал үүсгэлүй, халдвар хамгааллын дэглэмийг сайтар мөрдөж баяр наадам зохион байгуулахаар болж байна. Энэ асуудал та ямар байр суурьтай байна вэ?
-Улсын онцгой комиссын шийдвэрийг л дагаж мөрдөнө. Үндэсний их баяр наадам бол зөвхөн бөх, уяач, сур харваадын л баяр цэнгэл биш. Улсаа тунхаглаж, тусгаар тогтнолоо олсны баяр. Түүхийн хувьд ч чухал ач холбогдолтой зүйл. Халдвар хамгааллын дэглэмийг мөрдөж монгол наадам болоосой л гэж бодож байна.
-Увс нуурын хүчтэнүүд бэлтгэлээ хэрхэн базааж байна вэ?
-Жил бүр зургадугаар сарын эхээр бөхчүүд гал галаараа надмын бэлтгэлдээ гардаг. Энэ жил цаг үеийн нөхцөл байдлаас шалтгаалж бөөнөөрөө бэлтгэл хийх боломж гарсангүй. Миний тухайд барилдааны бэлтгэлээ хувьдаа л базааж байна” гэв.
Мөн бид 2017 оны улсын наадмын түрүү бөх Хөвсгөл аймгийн Тосонцэнгэл сумын харьяат улсын арслан Ц.Содномдоржтой холбогдож тодруулга авсан юм.
Тэрбээр “Түүхэн өв соёлын дархлаа болсон Монгол наадмаа тасалдуулалгүй тэмдэглэх нь зөв. Энэ жилийн тухайд би амралтын байдалтай, гэрийн хорионд байлаа. Саяхнаас хувийн бэлтгэлээ базааж эхлээд байна. Урьд жилүүдийнхийг бодвол жаахан сул бэлтгэлтэй наадамдаа зодоглох нь шиг байна. Наадам зохион байгуулахыг хувьдаа дэмжиж байна. Бөхчүүдийн бүтэн жилийн хөдөлмөр шүү дээ. Наадмаа цомхон тэмдэглэх нь зөв” гэсэн юм.
Мөн Дархан-Уул аймгийн харьяат аймгийн арслан С.Ерөөлт “Наадам зохион байгуулахыг дэмжиж байна. Нарантуул захаар өдөрт хэдэн зуун хүн орж гарч байна шүү дээ” гэв. Бөхчүүдийн тухайд Улсын онцгой комиссын шийдвэрийг дэмжсэн байр суурьтай байна. Өнөө жилийн баяр наадмаар олон мянгуулаа цуглахгүй, цомхон зохион байгуулахыг дэмжсэн байр суурийг илэрхийлж байна.