ЭМЯ-наас өнөөдөр цаг үеийн мэдээлэл хийлээ. Монгол Улсын иргэд болох 30-60 насны гурван эмэгтэй коронавирусийн халдвар авсан нь баталгаажсан. Мөн Франц улсын иргэний сэтгэл санаа өндөр, биеийн байдал нь хэвийн байгааг албаныхан хэллээ. ХӨСҮТ-ийн захирал Д.Нямхүү, “III сарын 10-нд коронавирусийн халдвартай нь батлагдсан Франц иргэнтэй ойрын хавьтлын 88 иргэний шинжилгээний хариу сөрөг гарсан. Тусгаарлах арга хэмжээ үргэлжилж байгаа. Мөн Баян-Өлгий аймагт тусгаарлагсадн хоёр иргэний шинжилгээний хариу сөрөг гарсан. Мөн III сарын 16-ны өдөр БНСУ-аас ирж, тусгаарлагдсан хоёр, Франц улсаас дамжин ирсэн нэг иргэнээс коронавирус /Covid-19/ илэрсэн. ХӨСҮТ-д дээрх батлагдсан гурван тохиолдлын ойрын хавьтал болох 111 хүнийг тусгаарлаж, шинжилгээ хийсэн. 61 хүнээс коронавирус илрээгүй. Бусад хүмүүсээс шинжилгээ авах ажил үргэлжилж байна” гэлээ.