Улаанбаатар хотыг урт хугацаанд хөгжүүлэх хөтөлбөр, бодлогын баримт бичгийг нийслэлийн Засаг даргын Тамгын газраас боловсруулсан. Тэгвэл энэ ажил дүүргүүдэд хэрэгжихээр болсон байна. Эхний ээлжинд Сонгинохайрхан, Налайх дүүргийг дунд хугацааны бодлогын баримт бичигтэй болгох судалгааны ажил хийгдэж байгаа аж. Энэхүү баримт бичиг боловсруулах багийн төлөөлөлтэй НЗДТГ-ын дарга Р.Батрагчаа өнөөдөр санал солилцох уулзалт хийлээ.
Уулзалтаар 2 дүүргийн хүн амын амьжиргааг дээшлүүлэх, ажилгүйдлийг бууруулах, дүүргийн орчин нөхцөл байдлыг сайжруулах гээд олон асуудлыг тусгахаар төлөвлөсөн байна.
НЗДТГ-ын дарга Р.Батрагчаа уулзалтын үеэр “Тогтвортой хөгжлийн зорилтын хүрээнд Сонгинохайрхан, Налайх дүүргийн дунд хугацааны бодлогын баримт бичиг боловсруулахаар төлөвлөж байна.Ингэснээр Улаанбаатар хотын Захирагчийн дэвшүүлсэн “Хүн төвтэй хот”, “Орчин төвтэй хот”, “Төлөвлөлт төвтэй хот” гэсэн гурван санаачилга дүүргүүдэд хэрэгжих боломж бий болно гэж харж байна” гэлээ.