Английн Премьер лигийн 22-р тойргийн хүрээнд Манчестер Сити клуб Астон Виллагийн талбайд зочлон тоглож 6:1-ээр хожсоноор лигийнхээ хоёрдугаар байр луу дэвшлээ. Энэхүү тоглолтонд Аргентин довтлогч Серхио Агуеро хэттрик хийж хоёр рекордыг шинэчиллээ. Тэрээр Премьер лигт хамгийн олон удаа хэттрик хийсэн тоглогч болоод буй юм. Агуеро өнгөрсөн шөнийн тоглолтонд Премьер лигийн 12 дахь хэттрикээ хийсэн билээ. Түүнээс өмнө энэхүү амжилтыг Алан Ширер 11 хэттрик хийсэн үзүүлэлттэйгээр эзэмшиж байсан юм. Серхио Агуерогийн шинэчилсэн өөр нэгэн рекорд нь Премьер лигт хамгийн олон гоол оруулсан Англи бус тоглогч гэх алдар билээ. Агуеро одоогийн байдлаар Премьер лигт 176 гоолыг оруулаад буй юм. Түүний энэхүү үзүүлэлт нь Премьер лигийн бүх цаг үеийн мэргэн буучдын жагсаалтын тавдугаар байрт бичигдэх амжилт билээ. Премьер лигийн бүх цаг үеийн мэргэн буучдын жагсаалтыг Алан Ширер 260 гоол оруулсан амжилттайгаар тэргүүлдэг бөгөөд Агуерогийн дээр бичигдэж буй Фрэнк Лампард 177 гоолтой байгаа юм.
У.ЧИНЗОРИГ