Сэлэнгэ аймгийн Ерөө сумын нутаг Могойт гэдэг газарт Сибирийн хар баавгай айл руу дайрч, аав хүү хоёрын аминд хүрсэн харамсалтай хэрэг гарсан. Үүнтэй холбогдуулан Сэлэнгэ аймгийн онцгой комисс хуралдаж дээрх бүс нутагт онц байдал зарлалаа.
Аймгийн онцгой комиссын дарга Ш.Оргил “Бид юу юуны түрүүнд хүнээ бодох учиртай. Хүнээс илүү үнэ цэнэтэй зүйл гэж үгүй. Баавгай явж байгаа сумдад хэрхэн яаж ажиллахаа тодорхойлж, мэргэжлийн баг бүрэлдэхүүнийг ажиллуулан холбогдох арга хэмжээг авна” гэлээ.
Иймд ард иргэд малаа хариулах, самар, жимс түүх, байгалийн бусад баялгийг ашиглах, хадлан хадах, тариа хураах зэргээр хөдөө орон нутаг руу зорчихдоо анхаарал болгоомжтой байхыг сануулсан байна. Мөн малчин айл өрхүүд хүнс хоол тэжээлийн зүйлсээ өөрсдийн унтаж амардаг газраасаа тусад нь өөр гэрт байлгах шаардлагатай гэжээ.