ЭХЭМҮТ-ийн Тандалт судалгааны алба нь ЭМЯ-ны Удирдлагын зөвлөлийн хурлын шийдвэр, ЭМС-ын тушаалыг хэрэгжүүлэх үүднээс эхийн ноцтой хүндрэл, эндэгдлээс сэргийлэх зорилгоор “Эх барихын, эх барихын бус шалтгаант үжил халдварууд, оношилгоо, эмчилгээ, яаралтай авах арга хэмжээ, зөвлөмж” сэдэвт цахим хурал хийлээ.
Цахим хурлыг ЭХЭМҮТ-ийн Эмчилгээ эрхэлсэн дэд захирал Г.Баттулга нээж, 2019 оны эхний 9 сарын байдлаарх Монгол улс дах эхийн эндэгдлийн талаар тойм мэдээллийг танилцуулж, Эрчимт эмчилгээний тасгийн зөвлөх эмч С.Амармандах “Үжил халдвар, оношилгоо, эмчилгээ, яаралтай авах арга хэмжээ, зөвлөмж” сэдвээр онолын мэдээлэл хийлээ.
Эх барихын, эх барихын бус үжил халдварын шалтгаантай эхийн эндэгдлийн тохиолдлуудад хийсэн сургамж дүгнэлтийг Хүрээ амаржих газрын ЭЭОД Д.Цэцэгээ, Өргөө амаржих газрын чанарын менежер З.Мөнх-Од, зөвлөх эмч Ш.Цэрэнсамбуу, УГТЭ-ийн Уушги судлалын тасгийн эмч Т.Оюунчимэг нар танилцуулав.
ЭХЭМҮТ-ийн зөвлөх эмч С.Амармандах Монгол улсад сүүлийн жилүүдийн эхийн ноцтой хүндрэл, эндэгдлийн шалтгаанд эх барихын үжил халдвар зонхилж байгааг дурьдаад, үжлийн эмнэлзүйн шинжүүдийг эрт таних, илрүүлэхэд оношилгооны биомаркерууд, туслах шинжилгээнүүдийг хийж, өөрчлөлтийг үнэлэн, эмчилгээнд тусгахын ач холбогдлыг онцоллоо. Эх барихын халдварын гол онцлог нь хавсарсан нянгаар үүсгэгдэж, тэсвэртэй штаммаар солигдож байдагтай уялдуулан антибиотик эмчилгээний сонголтыг анхаарах, нянгийн эсрэг эмийн эмчилгээг үр дүнтэй байлгахын тулд эмийг зөв сонгож, тун, хэлбэр, хоорондын зай, хэрэглэх аргыг оновчтой шийдэн, эмчилгээг цаг алдалгүй хийхийг зөвлөв.
Цахим хуралд ЭХЭМҮТ-ийн ЭБЭЭ-ийн зөвлөх эмч, чанарын менежер, ТСА, СМЗТ-ийн эмч нар, амаржих газрууд, УГТЭ, УНТЭ, Архангай, Өвөрхангай, Баян-Өлгий, Баянхонгор, Булган, Сэлэнгэ, Хөвсгөл, Дорноговь, Дундговь, Өмнөговь, Дархан-Уул, Төв, Говьсүмбэр, Увс, Завхан, Сүхбаатар аймгийн ЭМГ, НЭ-ийн удирдлага, чанарын албаны дарга, менежер, эх барих эмэгтэйчүүдийн эмч, зөвлөх эмч, ерөнхий мэргэжилтэн нар, Нийслэлийн Түргэн тусламжийн төв, Баянгол, Хан-Уул, Чингэлтэй, Сонгинохайрхан, Багануур, Баянзүрх дүүргийн ЭМТ-ийн эх барих эмэгтэйчүүд, дотрын эмч, чанарын менежер, Жаргалант, Гачуурт, Хонхор, Туул тосгоны эх барих эмэгтэйчүүд, өрхийн эмч нарын төлөөлөл бүхий 165 хүн оролцлоо.