БНХАУ байгуулагдсаны 70 жилийн ой энэ оны аравдугаар сарын 1-ний өдөр тохиож байгаа аж. Энэ тэмдэглэлт ойн баяраа Хятад улс нижгэр тэмдэглэхээр төлөвлөж байна. Уг баярыг Хятад улс таван жилд нэг удаа тэмдэглэдэг. Энэ баярын хүрээнд улсын нийслэл Бээжин хотын Тяньмений талбай болон төв гудамж, соёлын газруудыг чимэж, тусгайлан бэлтгэжээ.
Хятад улсын хувьд энэхүү ойн баяр энэ жилийн хамгийн том арга хэмжээ юм. Баярын нээлтийг ирэх сарын 1-ний өдөр нээх аж. Энэ үеэр ихэнх замуудыг хааж, баярын нээлтийг төв талбайд хийсний дараа хотын төвийн томоохон замуудаар цэргийн хүнд даацын машин болон хамгийн сүүлийн үеийн цэргийн машины парад болох юм байна. Хятад улс энэхүү ойн баяраа нэг жил бэлтгэжээ. Баярын арга хэмжээнд нь улсын байгууллага, хувийн байгууллагууд, энгийн иргэд бүгд хамтран ажиллаж байна.
Баярын бэлтгэлтэй холбоотой нэг сарын хугацаанд долоо хоног бүр зам, метро, томоохон цэнгээний газрууд болон үзвэрийн газруудыг хаасан хэдий ч улсын хамгийн том арга хэмжээний төлөө сэтгэл нэгдсэн иргэд огт төвөгшөөгөөгүй байгаа нь тус баяр иргэн бүрийн хувьд чухал байр суурийг эзэлдэг болохыг харж болохоор байна.
1949-2019 оны хоорон дахь 70 жилийн хугацаанд Хятад улс ард иргэдээ ядуурлаас гаргаж, дэлхийд алдартай дэвшилтэт технологийг зохион бүтээж, дэлхийн соёлыг нэвтрүүлж, нээлттэй болон дэлхийн хоёрдахь хамгийн том, хүчирхэг эдийн засагт гүрэн болж чаджээ. Хятад хүн бүр улс орныхоо өнгөрсөн амжилтаар бахархахаас гадна ирээдүйд улам ихийг хийж бүтээн, бусад улсыг дагуулан хөгжихөөр сэтгэл шулуудсан байна.
Мөн баяртай холбогдуулан есдүгээр сарын 23-наас эхлэн аравдугаар сарын 1-ний өдрийг дуустал Хятад оронд сүүлийн 70 жилд гарсан дэвшилт, өөрчлөлтийг хамгийн сайн харуулж чадах арга хэмжээнүүд зохион байгуулагдаж байна. Хятад хүмүүс төдийгүй гадны зочид улсын хөгжлийн өөрчлөлттэй танилцаж байна. Хятад улс төрсөн өдрөө тэмдэглэсний дараагаар улс даяар аравдугаар сарын 1-7-ны өдрийг хүртэл амрах юм байна. Тиймээс, иргэдийн хувьд аравдугаар сар энэ оны хамгийн сайхан сар байх нь тодорхой.
Э.АНУДАРЬ