Баяр наадмын зохион байгуулах хорооны Бөхийн салбар хорооны өнөөдрийн хурлаар Ардын хувьсгалын 98 жилийн ой, Үндэсний их баяр наадмын түрүү бөх Улсын аварга Э.Оюунболдод хүндэтгэл үзүүлэх, цолны мялаалгын наадмын товыг цуцалжээ. Цолны мялаалгын наадам энэ сарын 18-ны өдөр Хэнтийн аймагт зохион байгуулагдахаар товлогдсон байсан юм.
Баяр наадмын зохион байгуулах хорооноос хориотой бодис хэрэглэсэн хоёр бөх байгаа гэдгийг олон нийтэд мэдэгдсэн. Хориотой бодис хэрэглэсэн хоёр бөхийн нэр одоогоор тодроогүй байгаа учир баяр наадмын зохион байгуулах хорооны Бөхийн салбар комиссоос Улсын аварга Э.Оюунболдын цолны мялаалгын наадмыг ийнхүү түр хугацаагаар хойшлуулжээ.
Хэрвээ хориотой бодис хэрэглэсэн гэх хоёр бөх “В” сорьцийг шинжлүүлнэ гэж Допингийн эсрэг үндэсний төвд хандвал шинжилгээний хариу ахин 10-аас дээш хоногоор сунгагдах юм. Харин тус хоёр бөх “В” сорьцыг шинжлүүлэхгүй гэвэл албан ёсоор наймдугаар сарын 19-нд нийтэд зарлах юм.