БНХАУ-ын Засаг захиргааны онцгой бүс /ЗЗОБ/ Хонконгт өрнөж буй эсэргүүцлийн үйл ажиллагаа улам идэвхжиж, эмх замбараагүй байдал үүсч, үймэн самуун дэгдэн, цагдаа, жагсагчид болон жагсагчдын эсрэг бүлэглэлүүдийн хооронд тогтмол мөргөлдөөн гарч байна. Наймдугаар сарын 12-ны өдөр Хонконгийн олон улсын нисэх буудалд олон мянган хүн цуглаж, нислэгийн бүртгэлийн ажиллагаа саатсан тул 16.00 цагаас хойшхи бүх гарах нислэгийг цуцлажээ.
Үүний улмаас МИАТ-ын онгоц өчигдөр Хонконгод газардаж чадаагүй байна. Хонконгийн олон улсын нисэх онгоцны буудал гадагшаа чиглэсэн бүх нислэгээ зогсоож, түр хугацаанд нислэг хүлээж авах боломжгүй болсон тухай мэдэгдэл Улаанбаатар-Хонконг чиглэлийн нислэг хөөрсний дараа МИАТ-д иржээ.
Улмаар Улаанбаатар-Хонконг чиглэлийн ОМ2971 аяллын нислэг зэргэлдээх Гуанжоу хотод 17:52 цагт газардаж, түлш болон хоолны үйлчилгээ аван, 20:15 цагт Улаанбаатарын чиглэлд хөөрсөн байна.
Тиймээс дээрх чиглэлд нислэг үйлддэг МИАТ компанийн хуваарьт нислэгүүд хойшлогдоод байгаа юм.