Цагдаа, дотоодын цэргийн Сургалтын нэгдсэн төвд Цагдаагийн газар, хэлтсийн нохой хөтлөгчдөд зориулсан мэргэжлийн ур чадварыг дээшлүүлэх, гэмт хэрэг илрүүлэх чиглэлээр дадлагажуулах, албаны нохойн хүчин чадлыг сэргээх, давтан сургалтыг 05 дугаар сарын 27-ны өдрөөс 07 дугаар сарын 25-ны өдрүүдэд амжилттай зохион байгууллаа.
Энэ удаагийн сургалтад Булган, Баянхонгор, Завхан, Баян-Өлгий, Өмнөговь, Дорноговь, Увс, Ховд, Дархан, Орхон, Говь-Алтай, Хэнтий зэрэг 12 аймаг дахь цагдаагийн газрын нохой хөтлөгч нар хамрагдсан юм. Энэ удаагийн сургалт Эрэлч нохойн алба үүсэн байгуулагдсны түүхт 75 жилийн ойн босгон дээр зохион байгуулагдаж байгаагаараа онцлогтой.
Сургалтыг хээрийн дадлага, гэмт хэргийн газарт албаны нохойг ашиглах техник, арга зүй гэсэн төлөвлөгөөний дагуу “Нарстай” дахь хээрийн сургалтын хэсэг, гэмт хэргийн гаралт ихтэй Нийслэлийн Сонгинохайрхан, Баянзүрх дүүргүүд дээр албаны нохойтой мөрдлөг, сонгон ололт, самнан нэгжлэг зэрэг сургалтуудыг өдөр, шөнийн цагуудаар хийлгэн гэмт хэргийн газарт албаны нохой ашиглахдаа анхаарах асуудлуудыг практик байдлаар зааж сургасан байна.
Сургалтад хамрагдсан алба хаагчдаас сургалтын үр дүнг тооцох төгсөлтийн шалгалтыг авч, гэрчилгээ гардуулах үйл ажиллагааг өнөөдөр зохион байгууллаа. Энэ үеэр Цагдаагийн ерөнхий газрын даргын тушаалаар тус албанд 7 жил үр бүтээлтэй ажилласан, удам дамжсан цагдаагийн эрэлч нохойн төлөөлөгч, цагдаагийн ахлах ахлагч Б.Тэмүүжинд “Цагдаагийн дэслэгч” цол шагнасан юм.