Монголын Урлагийн зѳвлѳл соёлын олон тѳрлийг хѳгжүүлэх, техник технологийн дэвшилд тулгуурласан дэлхийн шилдэг бүтээлийг Монголын үзэгчдэд хүргэх, дүрслэх урлагийн салбарын олон улсын хамтын ажиллагааг нэмэгдүүлэх зорилгоор “Улаанбаатар” олон улсын медиа урлагийн наадмыг дѳрѳв дэх удаагаа буюу 2019 оны зургадугаар сарын 21-нээс долдугаар сарын 7-ны хооронд Үлэг гүрвэлийн музей, Сайншанд хот, Хамрын хийд болон “ MN17 Галерей”, Playtime амьд хѳгжмийн наадмын талбайд зохион байгуулахаар боллоо.
Тус наадмын зохион байгуулагчаар Гёте институт, ивээн тэтгэгчээр Нидерландын Стимулеринг сан, АНУ дахь Монголын Урлагийн Зѳвлѳл, MSM групп, Нидерландын TodaysArt, UBINN зочид буудал, Үлэг гүрвэлийн тѳв музей, тус тус ажиллахаар болсон хэмээн “Монголын урлагийн зѳвлѳлийн гүйцэтгэх захирал” О.Одгэрэл мэдээллээ. Мөн энэхүү наадмын хүрээнд Гёте институттэй хамтран “Нүүдэл суудлын хүүрнэл” зүүн ѳмнѳд Ази, Монгол АНУ-ын 14 уран бүтээлчийн хамтарсан үзэсгэлэнг Азийн шинэ залуу 8 куратор дэглэн зургадугаар сарын 27-ноос долдугаар сарын 7-ны хооронд “MN17” галерейд олон нийтэд үнэ тѳлбѳргүй толилуулах аж.
Т. ЛХАМСҮРЭН