Дэлхийн банкнаас “Төсвийн зардлын тойм судалгаа”-г энэ сарын 24-нд танилцуулсан юм. Тэдний зүгээс төсвийн орлогод хамаарч буй уул уурхайн салбарын нөлөөллийг бууруулах, орлогын шаталсан системийг аажмаар нэвтрүүлэхийг зөвлөв. Мөн “Эдийн засгийн өсөлт нь уул уурхайгаас хэт хамааралтай байгаа гол шалтгаан нь мөчлөг дагасан төсвийн тэлэлт бий болсонтой холбоотой” хэмээн Монгол Улсыг хариуцсан ахлах эдийн засагч, ноён Жон-Паскаль үзэж байв. Түүнчлэн Дэлхийн банкнаас гаргасан тайланд “Уул уурхайн салбарын гадаадын шууд хөрөнгө оруулалт, нийт ГШХО-д эзлэх хувь 1990-2004 онуудад 44 хувьтай байсан бол 2018 онд 72 хувь болж өссөн байна. Мөн 2011-2016 онуудад төсвийн зардал их хэмжээгээр нэмэгдэн, энэхүү зардлын тэлэлтийг өрөөр санхүүжүүлсэн нь Засгийн газрын өрийг нэмэгдэхэд хүргэжээ” гэдгийг онцолсон юм.