Өнөөдөр Үндэсний мэдээллийн төвд Увс аймгийн Бөхмөрөн сумын “Гулзатын санаачилга” ТББ-аас тус аймгийн Засаг даргыг хууль бус үйлдэл хийсэн хэмээн мэдээлэл хийлээ.
Тус ТББ нь 2007 онд Увс аймгийн Бөхмөрөн, Сагил сумын хил залгаа агнуурын нөөц газрыг хамгаалах, зохистой ашиглах, нутгийн иргэдэд агнуурын менежментийг таниулах зорилгоор аргаль, угалзыг хамгаалан ажиллаж эхэлжээ.
2016 онд тус аймгийн Засаг даргаар ажиллаж эхэлсэн Д.Батсайхан нь “Гулзатын санаачилга” ТББ-ын үйл ажиллагаанд хөндлөнгөөс оролцон гүйцэтгэх захирлыг томилох, “Ан агнуурын менежмент түүний хэрэгжилтийг хангах арга хэмжээний тухай” Увс аймгийн Засаг даргын 2015 оны А\583 тоот захирамж, 2015 онд байгуулсан “Гулзат” ОНХГ-ын агнуурын бүс нутгийн менежментийг хариуцах хамтын ажиллагааны гэрээ зэргийг хүчингүй болгосон, 2017 онд дотоод бүтэц, төлөвлөгөөгүй “Гулзатын нөхөрлөлүүдийн холбоо” ТББ-д орон нутгийн хамгаалалттай бүс нутгийг хариуцуулсан захирамж гаргасан нь Захиргааны ерөнхий хуулийн 47.1.6-г зөрчсөн гэж үзсэн аж.
“Гулзатын санаачилга” ТББ-ын гүйцэтгэх захирал Д.Хүрэлбаатар “Аймгийн ИТХ-аар баталсан менежментийн төлөвлөгөөнд нэг жилд 6 хүртэлх аргалийг агнуулж болно гэж заасан байдаг. Өмнөх жилүүдэд 2-4 аргаль агнаж байсан. 2017 онд БОАЖЯ-нд 6 аргаль агнуулах захиалгыг Засаг дарга 10 болгон батлуулсан” гэв.
Т.ЛХАМСҮРЭН
Б.АМИНАА