Сэлэнгэ аймгийн Баянгол сумын Нарангийн гол гэдэг газар уурхайн ажилтан 29 настай эрэгтэй Б хөрсний овоолго зөөж тээвэрлэн ашиглалт явуулсан талбайд нөхөн дүүргэлт хийх явцдаа “Хово 371” загварын ачааны автомашинтай уурхайн нуур руу унаж осолдсон хэрэг гарсан юм. Ослын газарт Дархан-Уул, Сэлэнгэ аймгийн Онцгой байдлын газрын алба хаагчид ажиллаж байгаа бөгөөд өчигдөр автомашиныг татан гаргажээ. Энэ сарын 26-ны өдөр осолдсон автомашины байршлыг 10-11 метрийн гүнд байгааг тогтоосон бөгөөд маргааш нь алба хаагчид дахин шумбалт хийн шалгахад осолдсон автомашины бүхээгийн баруун талын цонх хагарсан, кабин дотор хүн байхгүй байжээ. Осолдсон ажилтны цогцсыг эрэн хайх ажиллагаа үргэлжилж байна.