АНУ-ын Ерөнхийлөгч Дональд Трамп энэ оны эхний улиралд 30 гаруй сая ам.долларын хандивыг 2020 онд болох АНУ-ын ерөнхийлөгчийн сонгуулийн өмнөх кампанит ажилдаа цуглуулсан тухай дэлхийн томоохон хэвлэлүүд мэдээлж байна. Тэрбээр ийнхүү цуглуулсан хандивынхаа хэмжээгээрээ бусад өрсөлдөгчдөө хол хаяад байгаа ажээ. Түүний араас Ардчилсан намын нэр дэвшигчид болох сенатч Берни Сандерс 18 гаруй сая ам.доллар, сенатч Камала Харрис 12 сая орчим ам.долларын хандив цуглуулснаар удаалж байгаа юм байна.
АНУ-ын дараагийн Ерөнхийлөгчийг сонгох ээлжит сонгууль 2020 оны арваннэгдүгээр сарын 3-ний өдөр болно. Харин сонгуулийн кампанит ажил 2020 оны хоёрдугаар сард албан ёсоор эхлэх юм.
Одоогийн байдлаар Трампын сонгуулийн штаб дээрх хандивыг оруулаад нийтдээ 40 гаруй сая ам.доллар төвлөрүүлжээ. Үүнээс харахад, нэг хандивын дундаж хэмжээ 34 орчим ам.доллар болж байгаа аж. Ардчилсан намын их хурал 2020 оны долдугаар сарын 13-16-нд Висконсин муж улсын Милуоки хотод болж, Ерөнхийлөгчийн суудлын төлөө Дональд Трамптай өрсөлдөх хүний нэрийг зарлах бол Бүгд Найрамдахчууд 2020 оны наймдугаар сарын 24-27-ны хооронд Хойд Каролина муж улсын Шарлотт хотод их хурлаа хийх гэнэ.