Энэ оны нэгдүгээр улирлын байдлаар нийтийн тээврийн автобусанд үйлдэгдэх халаасны хулгайн хэрэг нэмэгдэх хандлагатай болсон байна. Тиймээс Нийслэлийн Цагдаагийн газраас нийслэлийн Тээврийн газар, Улаанбаатар смарт компани, нийтийн тээврийн үйлчилгээ эрхлэгч байгууллагуудтай уулзалт хийсэн байна. Ингэхдээ ирэх зургаадугаар сарын нэгний дотор нийтийн тээврийн үйлчилгээнд явж буй бүх автобусыг камержуулахаар болжээ.
Мөн цагдаагийн байгууллагаас халаасны хулгайн гэмт хэрэг үйлддэг гурван бүлэг 18 этгээдийг дайчлан баривчилж, шалгасан байна. Хууль бусаар гар утас худалдан борлуулдаг гурван ченжид эрүүгийн хэрэг үүсгэн, шалгаж буй аж. Энэ ченжүүдээс хууль бусаар олж авсан, гарал үүсэл нь тодорхойгүй 70 гаруй гар утсыг хурааж авчээ. Одоогоор утсыг таниулах, эздэд нь хүлээлгэн өгөх ажил үргэлжилж байна Тиймээс гар утсаа хулгайд алдсан иргэд нийслэлийн Цагдаагийн газрын Мөрдөн шалгах газарт хандах боломжтой.
Цагдаагийн байгууллагаас цаашид хууль бусаар гарт утас худалдан борлуулж буй ченжүүдтэй эрчимтэй тэмцэнэ гэдгийг хэлж байна. Энэ хүрээнд Монтел, Теди төвүүдтэй гэрээ байгуулжээ.