Энэ лхагва гаригт буюу 2019.04.10-нд “Event Horizon Telescope” төслийнхөн сансрын уудамд орших хар нүхний гэрэл зургийг олон нийтэд цацах гэж буйгаа мэдээллээ. 2006 оноос эхлэн хар нүхийг судлах ажлаа эхлүүлсэн уг байгууллага дэлхий даяар телескоп дуран байрлуулж, томоохон шинжлэх ухааны байгууллагуудтай хамтран ажилласны үр дүнд ийнхүү дэлгэхээр болжээ. Хар нүхний зургийг танилцуулснаар өнөөг хүртэл дэвшүүлсэн эрдэмтдийн тооцоо таамгийг үнэн худал эсэхийг батлах аж. Стэфан Ховкинг, Альберт Эйнштэйн нар хар нүхний талаар онол, таамгуудыг гаргасан бөгөөд цаг хугацаа, орон зайг гажуудуулдаг сансрын уудамд орших оддын томоохон бөөгнөрлийн голд үүсдэг супер масстай нүх юм гэж тодорхойлдог билээ.