Дархан-Уул аймгийн ИТХ-ын Тэргүүлэгчдийн 76 дугаар тогтоолоор батлагдсан “Тохижилт, цэвэрлэгээний талаар иргэд, аж ахуйн нэгж, байгууллагаас дагаж, мөрдөх журам” болон бусад дүрэм, журмын дагуу уламжлалт сар шинийн баярын өдрийг угтсан бүх нийтийн их цэвэрлэгээг бямба гаригт зохион байгуулах гэж байна. Иймд төрийн болон хувийн хэвшлийн бүх байгууллагууд 50 метр орчмын их цэвэрлэгээнд зохион байгуулалттай оролцож, сар шинийн баяраа угтахыг аймгийн Захирагчийн ажлын албанаас уриалж байна. Цэвэрлэгээний ажилд бүх шатны Засаг дарга нар болон аймгийн Мэргэжлийн хяналтын газар, Захирагчийн ажлын алба хяналт тавин ажиллах аж. Энэхүү ээлжит их цэвэрлэгээний үеэр Нийтийн аж ахуй үйлчилгээний газар нь нийтийн эзэмшлийн гудамж зам талбайн цас мөс, хог хаягдлыг цэвэрлэхийн зэрэгцээ хайс, хашлага, хогийн сав, сандал, хөшөө, баримал, гэрлийн шон, эвдэрч гэмтсэн хашлагыг засварлаж нөхөх, шатсан гэрэлтүүлэг, гэрлэн чимэглэлийг сольж, сайжруулах ажээ.