“Мэргэжлийн боксын рингэнд 10 удаа тулалдан 10 удаа ялсан (9 КО) Н.Төгсцогтын хувьд энэ удаагийн тулаан карьерынх нь хамгийн чухал тулааны нэг болох ажээ.
Энэ тулааны талаар дуулгахад: “Төгсцогт-Маррерогийн “дуэль”-д хэн ялсан нь IBO буюу International Boxing Organization холбооны 57,2 кг -ийн эзэнгүй байгаа Дэлхийн аварга цол бүсийг эзэмших юм. Энэ тухай IBO албан ёсоор мэдээллээ. Мөн дараа нь WBC-ийн Дэлхийн аваргын цол, бүсийн төлөө тулалдах эрхтэй ч болно “ хэмээн АНУ дахь “Таван цагариг” сонины тусгай сурвалжлагч Ц.Энхтүвшин мэдээллээ.
Монгол Улсын гавьяат тамирчин, сонирхогчдын боксын олимп, ДАШТ-ий мөнгөн медальт, мэргэжлийн боксын рингэнд босоо яваа “KING TUG” Нямбаярын Төгсцогт 2019 оны нэгдүгээр сарын 26-нд WBC болон IBO холбооны дэлхийн аварга болж байсан Доминикан улсын боксчин Клаудио Марреротой 12 раунд тулалдах тулааны талбар нь “Өндөр чацтай хот” Нью Йоркийн НБА-ийн ” “Бруклин Нэтс”,НХЛ-ийн “Нью Йорк Айлендерс” багуудын тоглолтоо хийдэг 17 000 хүний суудалтай алдарт “Barclays Center” ордон юм.
Тулааныг 2019 оны нэгдүгээр сарын 26-нд Америкийн баруун эргийн 17:00 цагаас FOX ТВ сувгаар шууд дамжуулна. Энэ оройн гол тулаан нь WBA-гийн 66,8 кг-д Дэлхийн аваргын төлөөх Кэйт Турман-Хосесито Лопес нарын тулаан байх бөгөөд энэ оройн тулааны тасалбар 57$-757$ үнэтэй ticketmaster.com -оор зарагдаж байгаа аж.