Шүүхийн ерөнхий зөвлөлийн www.judcouncil.mn цахим хуудсаар шүүхийн мэдээлэл авч, санал хүсэлтээ өгөх боломжтой болсон талаар Хэнтий аймгийн шүүхийн тамгын газраас сэтгүүлчидтэй уулзах үеэрээ танилцууллаа.
Шүүхийн мэдээллийн технологийн хэлтэс “Монгол Улсын шүүхийн мэдээлэл” системийг боловсруулж, 2017 оны 11 дүгээр сараас нийт шүүхийн хэмжээнд нэвтрүүлсэн байна. Уг систем нь шүүхийн үүдэнд байрлах киоск төхөөрөмжөөр дамжуулан аль ч шүүхэд нэг загвараар Монгол Улсын шүүхүүдийн хаяг байршил, шүүх хуралдааны зар, шүүхийн танилцуулга, нэхэмжлэлийн загвар, шүүхийн ёс зүй, шүүхийн захиргааны ажилтны ёс зүй цэсээр мэдээлэл өгч, улсын тэмдэгтийн хураамжийн тооцоолох цэсээр тооцоолол хийж, санал асуулга цэсээр шүүхэд үнэлэлт өгч, санал хүсэлт цэсээр саналаа илгээх боломжтой юм. Системийг илүү өргөн хүрээнд ашиглахаар энэ сарын 19-ний өдрөөс эхлэн Шүүхийн ерөнхий зөвлөлийн цахим хуудсаар дамжуулан олон нийтэд нээлттэй ажиллуулж эхэлсэн аж. Иймээс иргэд заавал шүүхийн байранд очихгүйгээр мэдээлэл авч, санал хүсэлтээ Шүүхийн ерөнхий зөвлөлд илгээх боломжтой боллоо. Өөрөөр хэлбэл шүүхэд хандаж байгаа иргэд нэхэмжлэлээ гаргахын тулд өмгөөлөгчид мөнгө төлж загвар авах, шүүхэд өөрөө очиж асууж сураглах шаардлагагүйгээр www.judcouncil.mn сайтаас бэлэн загвар авах боломжтой юм байна.