Энэ сард Монголын нутаг дэвсгэрт Японы тагнуулын газрын төлөөлөгчид Хойд Солонгосын төлөөлөгчидтэй нууц уулзалт хийжээ. Аравдугаар сарын эхээр Улаанбаатар хотод болсон тус уулзалт нь Японы Ерөнхий сайд Шинзо Абэгийн Хойд Солонгосын удирдагч Ким Чен Унтай дээд хэмжээний уулзалт хийх төлөвтэй байгаагаа мэдэгдсэнтэй холбоотой байж магадгүй хэмээн таамаглаж байгаа аж.
Эх сурвалжийн мэдээлснээр, Японы засгийн газрын Тагнуул, судалгааны газрын дарга Сигэрү Китамура, Хойд Солонгосын хөдөлмөрийн намын Нэгдсэн фронтын газрын албан тушаалтан Ким Сон Хэ нар аравдугаар сарын 6-8-ны хооронд Улаанбаатар хотноо уулзжээ.
Уулзалтаар талууд 1970-80-аад онд Хойд Солонгосын тагнуулын албаныханд хулгайлагдсан гэгдэх Японы иргэдийг эх оронд нь буцаах асуудал, мөн Япон, Хойд Солонгосын дээд хэмжээний уулзалтыг зохион байгуулах боломжийн талаар хэлэлцсэн гэнэ.