Ашигт малтмал, газрын тосны газраас шатахууны үнийн өсөлт, нөөц хэмжээний талаар мэдээлэл хийлээ. Тус газраас мэдээлж буйгаар гадаад зах зээлийн нөхцөл байдлаас шалтгаалж манай улсад борлуулагдаж буй шатахууны жижиглэнгийн болон бөөний борлуулалтын үнэд өөрчлөлт орсон аж.
Тодруулбал, гадаад зах зээл дэхь газрын тосны үнийн өсөлт нь манай улсын жижиглэнгийн зах зээлд нөлөөлсөн байна. Энэ талаар газрын тосны бүтээгдэхүүний хангамж, гадаад эх үүсвэр хариуцсан ахлах мэргэжилтэн Г.Оюунбаяр “ Дэлхийн газрын тосны үнэд тодорхой өөрчлөлт орсон. Монголд ч гэсэн жижиглэн борлуулалтын үнийн ханшийн зөрүү гарч ирж байгаа. Үүнтэй холбоотойгоор өнгөрсөн долоо хоногт томоохон биржүүд дээр нэг тонн түүхий газрын тосны үнэ 612-632 ам.долларын хооронд байна. Энэ бол сүүлийн сарын мэдээлэл. Нэг баррель тосны үнэ 80-83 ам.доллараар нэмэгдэж орж ирсэн байна. Мөн брэнт түүхий тосны үнэ есөн сарын сүүлийн байдлаар 83.2 доллар гэсэн үнэтэй орж иржээ.Шатахууныг гадаад зах зээлээс 100 хувь импортоор оруулж ирдэг. Бид газрын тосны тухай хууль холбогдох хууль дүрмийндагуу ажилладаг. Өөрийн дураар үнэ нэмсэн ямар нэгэн асуудал байхгүй. Шатахууны үнийн өсөлт гадаад зах зээлээс хамааралтай гэдгийг дахин хэлмээр байна” гэсэн юм.