Есдүгээр сарын 05-ны Засгийн газрын хуралдаанаар сургуулийн орчинд гар утас хэрэглэхийг хориглох шийдвэр гаргасан. Тус шийдвэр өнөөдрөөс буюу аравдугаар сарын 01-нээс эхэлж хэрэгжиж эхлэх юм.
Тодруулбал, Засгийн газраас тогтоол гаргаж, Ерөнхий боловсролын сургууль, цэцэрлэгийн сургалтын орчинд ухаалаг гар утас ашиглахыг хязгаарлахаар заасан.
Энэ нь хүүхдүүдийг цахим халдлага, донтолт, гадуурхлаас сэргийлэх, эрүүл мэнд, амь насыг хамгаалах, аюулгүй байдлыг хангах, сурах идэвхийг нэмэгдүүлэх, хүүхдүүдийн чөлөөт цагийг үр ашигтай өнгөрүүлэх, нийгмийн бодит харилцаанд оролцох боломжийг нэмэгдүүлэх зорилготой авч буй арга хэмжээ юм.
Монгол Улсын нийт хүн амын 80.6 хувь нь интернет, 99.7 хувь нь гар утас хэрэглэдэг байна. БСШУСЯ, Дэлхий банктай хамтран 2017 онд явуулсан судалгаанаас үзвэл хот, хөдөө, орон нутгаас сонгогдсон 14 ерөнхий боловсролын сургуулийн 8-17 насны 1,278 сурагчаас 71.8 хувь нь өөрийн гар утастай аж. Тэдний 54.6 хувь нь цахим орчинд аялах боломжтой ухаалаг гар утас хэрэглэдэг гэсэн судалгаа гарчээ.
Түүнчлэн нийслэл дэх нийт сурагчдын 96.9 хувь нь цахим хаягтай бол хөдөөгийн сурагчдын 93 хувь нь цахим хаягаа тогтмол хэрэглэдэг байна.