Японы мэргэжлийн сумо бөхийн есдүгээр сарын Аки башёгийн 10 дахь өдрийн байдлаар Их аварга Хакүхо, Какүрюү нар есөн даваатай башёг тэргүүлж явна.
Монголын хоёр Их аваргын араас Озэки Такаясү, Гойэдо, маэгашира Рюүдэн нар найман даваа, нэг унаатайгаар нэхэж яваа бол 72 дахь Их аварга Кисэносато ес дэх өдөр озэки Точиношинтой барилдан давснаар долоон даваатай болов. Тэрбээр найм давж 50 хувийн амжилтаа үзүүлэх нь хамгийн эхний зорилт бол Озэки Точиношин таван даваа, дөрвөн унаатай байгаа нь сүүлийн өдрүүдэд гурав давах зайлшгүй шардлагатай болж байна.
Харин Озэки цолны сураг гараад байсан сэкивакэ Митакеүми сүүлийн өдрүүдэд гурав унаснаар байдал эвгүйтэв. Өнөөдөр тэр Какүрюү аваргатай барилдана. Сэкиваке Ичиножёо А.Ичинноров Икиойгоор гурван даваагаа авсан бол Комүсүби Тамаваши Б.Мөнх-Оргил найман унаатай болсноор цолоо алдах магадлалтай болов. Харин Маэгашира цолтой Такаинова А.Баасандорж Кёкүтайсэйг даван долоон даваатай болсон бол Чиёошима Г.Мөнхсайхан тав дахь даваагаа Айояамагаар авлаа.