Монголын өмгөөлөгчдийн холбоо болонАкадемич, гавъяат хуульч Ж.Амарсанаагийн санаачилгаар бүтээсэн “Гэрээ”, Монголын өмгөөлөгчдийн холбооноос эрхлэн гаргасан “Өмгөөлөгч гарын авлага”, “Хөрөг найруулал” номын нээлт боллоо.
Тус гурван номын онцлог нь:
“Өмгөөлөгч” ном нь өмгөөлөгчид болон судлаачдад зориулагджээ. Гэрээ ном нь иргэдэд зах зээлийн нийгэмд гэрээ хэлцэлгүйгээр ямар нэгэн тохиролцоо хийх боломжгүйг зөвлөсөн. Өмгөөлөгчөөс зөвлөгөө авах орон зай, хугацаа боломж нь ч хүндрэлтэй болжээ. Иймд иргэдэд мэдлэг мэдээлэл өгөх зорилготой “ гэрийн үйлчлэгчийн гэрээ”, “Нууц хаалтын гэрээ” гэх мэтчилэн өдөр тутам хэрэг болдог гэрээний загварыг оруулж өгсөн аж. Мөн шинээр гарсан хуультай холбоотойгоор гэрээг шинэчилж хийсэн байна. Харин “Хөрөг найруулал” номонд 99 өмгөөлөгчийн тухай дэлгэрэнгүй бичжээ. Эндээс ирээдүйд өмгөөлөгч болохыг хүсч байгаа оюутан залуус уншиж үлгэр жишээ авч, тэдний туулсан амьдралаас урам зориг аваасай гэж хүсэж гаргаснаа зохиолчид хэлэв.
Монгол Улсад Өмгөөлөгчдийн байгууллага үүсч хөгжсөний 90 жилийн ойг тохиолдуулан гаргаж буй бүтээл гэдгийг зохиогчид онцлосон.
Шинээр хэвлэгдэн гарсан “Гэрээ” номын талаар Хуульч Ж.Амарсанаа ярихдаа “Гэрээ номыг иргэд байгууллага, хуулийн этгээдэд зориулан бүтээсэн. Энэ номыг анх 1999 онд хуульч С.Бүдрагчаа анхны хэвлэлийг хариуцаж гаргаж байсан юм. Харин шинээр хэвлэгдэж гарсан “Гэрээ” ном 108 гэрээтэй, долоон бүлэгтэйгээр гарч байна. Бусдын өмчлөлд эд хөрөнгө шилжүүлэх, эзэмшил ашиглалтанд шилжүүлэх, ажил гүйцэтгэх гэх мэтээр бүлэглэсэн нь хуульчид, өмгөөлөгчид авч хэрэглэхэд хялбар байх болно. Түүнчлэн Шүүгч,прокурор, хэрэг бүртгэгч мөрдөн байцаагч, бусад төрийн албан хаагчид энэ гэрээг сонирхож үзэж болно. Арчдилсан зах зээлийн харилцаа бол тэр чигээрээ гэрээ юм. Тиймээс өмгөөлөгчдийн гарын авлага, эмч нарын хувьд чагнуур болдог шиг энэ чиглэлээр суралцдаг болон ажилладаг хүмүүст “Гэрээ” ном чагнуур болох болно гэдэгт найдаж байна гэв.
Б.ОЮУНЖАРГАЛ