УИХ-ын гишүүн О.Баасанхүү өөрийн фэйсбүүк хуудсаараа дамжуулан өнөөдөр мэдээлэл хийлээ.
Тэрбээр хэлэхдээ “Засгийн газраас бага ангийн багш нарын цалинг 12.3 хувь, дунд ангийн багш нарын цалинг найман хувиар нэмж, жилийн 300 мянган төгрөгийн урамшууллыг зогсоох санал гаргасан. Харин багш нар 8-12 хувь бус нийтэд нь 15 хувиар нэмж, 300 мянган төгрөгийн урамшууллыг авах шаардлагыг тавьж байгаа юм. Багш нар 2019 оны нэгдүгээр сарын 1-ны өдрөөс эхлэн дахин цалингийн асуудлаа 50 хувь нэмэгдүүлэх саналтай байгаагаа хэлж байгаа юм. Хүүхдүүд маань 14 хоног хохирлоо. Хувийн сургуульд хүүхдээ өгдөг хүмүүст багш нарын ажил хаялт хатуу сонсогдохгүй байгаа байх. Харин ч түгжрэл гайгүй боллоо гээд үл тоож байж магадгүй. Элсэлтийн ерөнхий шалгалтандаа бэлдэх гэж байгаа сурагчид, анхны хичээл үсэглэлийн баяр болох гэж байгаа үр хүүхдүүдийн эцэг эхчүүдэд хүнд байгааг ойлгож байна. Ерөнхий сайд У.Хүрэлсүх багш нарын ажил хаялтыг буруутгасан, үл тоосон, байдлаар ямар нэг хариу өгөхгүй байна. Энэ бол тийм хүнд асуудал биш. Хоёр тал ярилцаад, цалинг нь 15 хувиар нэмээд явахад болохгүй зүйл байхгүй. Дэд сайд, яамны удирдлагууд, газрын дарга нарын тансаг хэрэглээг танаж, багш нарын цалинг нэмэх боломжтой” гэв.
Б.НОМИН–ЭРДЭНЭ