Монгол Улсын Их Хурлын дэд дарга Я.Санжмятавын ивээлд манай оронд анх удаагаа зохион байгуулсан “Ази тивийн залуучуудын аварга шалгаруулах шатрын тэмцээн-2018” амжилттай болж, аваргуудаа тодрууллаа.

Тус тэмцээнийг Рапид /түргэвчилсэн/, Блиц /түргэн/, Стандарт гэсэн үндсэн гурван ангиллаар явуулсан бөгөөд Хятад, Энэтхэг, Солонгос, Индонези, Хонконг, Киргизстан, Казакстан, Узбек, Непал, Сингапур, Бангладеш, Иран, Тимур зэрэг Ази тивийн 11 орны 62 тамирчин оролцсон юм.

“Ази тивийн залуучуудын аварга шалгаруулах шатрын тэмцээн-2018”-ын стандарт ангиллын эмэгтэй төрөлд:

1 дүгээр байранд ОУХМ Ү.Үүрийнтуяа 7,5 оноогоор /Монгол Улс/,

2 дугаар байранд ОУХМ Chitlange Sakshi 7,5 оноогоор /БНЭУ/,

3 дугаар байран Фидэ мастер Б.Алтантуяа 7 оноогоор /Монгол Улс/ тус тус шалгарлаа.

Харин эрэгтэй төрөлд:

1 дүгээр байранд Фидэ мастер Priasmoro Novendra 8 оноогоор /БНИУ/,

2 дугаар байранд ОУХМ Yakubboev Nodirbek 7 оноогоор /БНУУ/,

3 дугаар байранд Ү.Агьбилэг 6,5 оноогоор /Монгол Улс/ тус тус шалгарав.

Эмэгтэйчүүдийн төрөлд алтан медалийн эзэн болсон ОУХМ Ү.Үүрийнтуяа нь энэ удаагийн тэмцээнд түрүүлж, Их мастер цолны 3 дахь нормоо биелүүлснээр Монгол Улсаас төрж буй 10 дахь Их мастер болж байна. Харин эрэгтэйчүүдийн төрөлд хүрэл медаль хүртсэн Ү.Агьбилэг энэхүү тэмцээнээс Фидэ мастерийн болзлыг хангалаа.

Мөн “Ази тивийн залуучуудын аварга шалгаруулах шатрын тэмцээн-2018”-ын хүрээнд “Mongolian open-2018”, өсвөрийн шатарчдын “Ирээдүйн олимп-2018”, “Ахмадын аварга шалгаруулах шатрын тэмцээн-2018” зэрэг тэмцээнүүдийг зохион байгуулсан юм. Эдгээр тэмцээнүүдэд 400 орчим тамирчин оролцохоор бүртгүүлжээ.

“Mongolian open-2018” тэмцээнд Их мастер Б.Гүндаваа, “Ахмадын аварга шалгаруулах шатрын тэмцээн-2018”-ын 50-иас дээш насны төрөлд /эрэгтэй/ ОУХМ Н.Төвсанаа, /эмэгтэй/ н.Баярмаа, 65-аас дээш насны төрөлд /эрэгтэй/ ОУХМ П.Жигжидсүрэн, /эмэгтэй/ Б.Мягмарсүрэн нар тус тус тэргүүн байрыг эзлэв.

Харин өсвөрийн шатарчдын “Ирээдүйн олимп-2018” тэмцээнийг эрэгтэй, эмэгтэй 6, 8, 10, 12 насны ангилалд явуулж, аваргуудаа тодрууллаа.

Ази тивийн залуучуудын аварга шалгаруулах шатрын тэмцээн нь манай улсад болж буй тив дэлхийн чанартай 4 дэх тэмцээн гэдгийг Монгол Улсын Их Хурлын дэд дарга, Монголын шатрын холбооны тэргүүн дэд ерөнхийлөгч Я.Санжмятав хаалтын үеэр хэлсэн үгэндээ тэмдэглээд, “Ийнхүү эх орондоо олон улсын хэмжээний тэмцээнийг амжилттай зохион байгуулсан баг хамт олондоо талархал илэрхийлье. Манай шатарчдын чанар чансаа улам сайжирч, оюуны спортын хөгжил хурдацтай байгаа эдгээр хоногуудад харлаа.

Нийт 18 медалийн төлөө тамирчид маань авхаалж самбаагаа сорин өрсөлдсөнөөс Монгол Улсын шатарчид хоёр алт, гурван мөнгө, дөрвөн хүрэл медаль буюу есөн медалийг хүртлээ. Мөн ОУХМ Ү.Үүрийнтуяа маань Их мастер цолны болзлоо бүрэн хангасан нь хамгийн сайхан үйл явдал боллоо. Энэ нь манай улсаас төрж буй 10 дахь, эмэгтэйчүүдийн зургаа дахь Их мастер болсныг хэлэхэд таатай байна. Эцэг эхчүүд хүүхдүүдээ шатрын спортоор хичээллүүлж, улам их амжилт гаргахыг хүсч байна” гэв гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.