Засгийн газрын 2016-2020 оны үйл ажиллагааны хөтөлбөрт бүх улстай хөгжүүлэх худалдаа, эдийн засгийн харилцаанд тэргүүлэх ач холбогдол өгч , гадаадын хөрөнгө оруулалтыг нэмэгдүүлэх, хөрөнгө оруулагчдын итгэлийг сэргээх, олон улсын худалдааны болон хөрш орнуудын боомтын бүсэд үйлдвэрлэл, худалдааг хөгжүүлэх, “Монгол экспорт” хөтөлбөр хэрэгжүүлэх, жижиг, дунд бизнес эрхлэгчдийн бизнесээ өргөжүүлэн хөгжүүлэх боломжийг нэмэгдүүлнэ гэж тусгасан.
Уг зорилтын хүрээнд Засгийн газрын 2018 оны наймдугаар сарын 8-ны өдрийн хуралдаанаар ОХУ-ын Москва, Владивосток хот, БНХАУ-ын Бээжин, Тяньжин хот, Япон Улсын Токио хот, БНСУ-ын Сөүл хот, Европын холбооны төв- Бельгийн Вант Улсын Брюссель хотод Монгол Улсын Худалдааны төлөөлөгчийн газрыг 2018-2024 онд үе шаттай байгуулах төлөвлөгөөг хэлэлцэн баталлаа. Ингэснээр Монгол Улс худалдааны голлох түнш орнуудад Худалдааны төлөөлөгчийн газар ажиллуулж байсан уламжлалаа 20 гаруй жилийн дараагаар сэргээх эхний алхамыг хийлээ.
Дээр дурдсан хотуудад Худалдааны төлөөлөгчийн газар байгуулах нь ОХУ, БНХАУ, Япон Улс, БНСУ, Европын холбооны орнуудтай хийх худалдааны эргэлтийг нэмэгдүүлэх, экпортын бүтээгдэхүүний нэр төрлийг олшруулах, транзит тээврийн зорилгоор ашиглах боомтын тоог нэмэгдүүлэх, тээвэр ложистикийн төслүүд хэрэгжүүлэх зэрэг ажлыг идэвхтэй урагшлуулах, эдгээр улстай худалдааны харилцаа хөгжүүлж буй аж ахуйн нэгжүүдийн эрх ашгийг хамгаалах зорилготой юм.