НИТХ-ын Тэргүүлэгчид цаг үеийн асуудлаар хуралдаж байна. Хуралдааны эхэнд Нийслэлийн төрийн өмчийн цэцэрлэг, сургуулийн элсэлт, бүртгэлийн талаар мэдээлэл хийлээ. Өнөөдрийн байдлаар нийслэл хотод 2017-2018 оны хичээлийн жилд сургуулийн өмнөх боловсролд төрийн өмчийн 227, төрийн бус 434 нийт 661 цэцэрлэг үйл ажиллагаа явуулж байна. 2018-2019 оны хичээлийн жилд сургуулийн өмнөх боловсролд төрийн өмчийн 222, төрийн бус 450, нийт 672 цэцэрлэгт 114252 хүүхэд хамрагдах төлөвтэй байгаа аж
Засгийн газраас дэвшүүлж буй “Хүүхэд бүрийг цэцэрлэгт” зорилтыг хэрэгжүүлэх ажлын хүрээнд эцэг, эх, асран хамгаалагч, иргэдэд нээлттэй, түргэн шуурхай чирэгдэлгүй үйлчилгээ үзүүлэх цахим бүртгэл мэдээллийн нэгдсэн удирдлагаар төрийн өмчийн цэцэрлэгийн үйл ажиллагааг дэмжих зорилгоор хийсэн. Цахим элсэлт 7-р сарын 27-ноос 8-р сарын 25 хүртэл зохион байгуулагдана. Нийслэлийн хэмжээнд бүх цэцэрлэгт очер, дараалал үүсэхгүй хүүхдийн бүртгэлийг гэрээсээ бүртгүүлэх боломж бий болсон. Цэцэрлэгт хамрагдаж буй 2-5 настай хүүхдийн мэдээллийн сантай боллоо. Мөн бүртгэл, элсэлт ил тод нээлттэй болсноор зогсохгүй ажлын ачаалал багассан. www.tsetserleg.ulaanbaatar.mn хаягаар элсэлт хийгдэж байна гэж НБГ-ын дарга Ж.Гантулга хэллээ.
Харин ерөнхий боловсролын сургуулийн хувьд нийт 241 сургууль бий. 2018-2019 оны хичээлийн жилд нэгдүгээр ангид 6 настай 34368 хүүхэд элсэнэ гэв.
Хурлын дэгийн дагуу Тэргүүлэгчид мэдээлэлтэй холбоотой асуулт асууж санал хэллээ. Хэдийгээр цэцэрлэг, сургуулийн талаар ерөнхий мэдээллүүдийг өгч байгаа боловч өнөөг хүртэл сургуульдаа биеийн тамирын залгүй, 10 жил биеийн тамирын хичээлд сууж үзээгүй олон сурагч байсаар байна. Мөн СӨБ болон ерөнхий боловсрол олгох боловсролын систем өөрөө их хэлбэр төдий байгаа тул хүүхдийн хүмүүжил, төлөвшлийн асуудалд онцгой анхаарах тэднийг сургаж байгаа багш нарыг дахин сургах асуудлууд огт хөндөгдсөнгүй гэдгийг хэллээ. “Хандив, тусламж хээл хахуулийн сүлжээнд орсон олон сургууль, цэцэрлэг байна. Энэ асуудлыг цэгцэл. Ойлгомжгүй олон асуудал байгаа тул тодорхой болгох зорилгоор бүх талын оролцоотой ажлын хэсгийг байгуулж асуудлыг яриад өнгөрдөг биш асуудлыг шийдвэрлье. Зарчмаа тодорхой болгохгүй бол хүүхдийн эрх ашигтай холбоотой асуудал цэгцрэхгүй байна” гэж НИТХ-ын дарга С.Амарсайхан ярьсан юм.
Ийнхүү энэ асуудлын хүрээнд ажлын хэсэг байгуулж нийслэлийн боловсролын байгууллагуудтай холбоотой тодорхойгүй асуудлыг нээлттэй болгож холбогдох бүх шатны байгууллагын төлөөлөл оролцсон ажлын хэсэг байгуулж ажиллах үүрэг өглөө.