УЛЬРИХ ФАУЛ: БИДНИЙ ТӨСӨӨЛЖ БАЙСНААС Ч ИЛҮҮ ИХ АЛМАЗ ЭРДЭНЭ БАЙГАА Ч ОЛБОРЛОХ БОЛОМЖГҮЙ ЮМ
Өнгөрсөн даваа гаригт АНУ-ын Массачусетсын Технологийн Их сургуулийн эрдэмтэд дэлхийн бөмбөрцгийн гүнд хэдэн квадриллион тонн хэмжээтэй алмаз эрдэнэ нуугдаж байгааг илрүүлсэн талаар “The Fortune” мэдээлжээ. Энэ талаар “Geochemistry”, “Geophysics”, “Geosystems” сэтгүүлүүдэд нийтэлсэн байна. Гэхдээ уул уурхайн олборлолт хийх найдлага байхгүй. Учир нь дээрх судалгаагаар орд газрууд нь дэлхийн гадаргуугаас 90-150 миль зайд оршиж буйг тогтоожээ.
Дээрх тооцооллыг гаргасан багийн гишүүн, Калифорнийн их сургуулийн эрдэмтэн Жошуа Гарбер “Бид галт уулын лав, дэлхийн гадарга болон цөмийн тооцооллоо улам нарийвчла гаргах үзүүлэлттэй систем боловсруулсны үндсэн дээр ийнхүү багцаалсан” гэж хэлсэн байна.
Квадриллион нь нэгийн ард 15 тэгтэй тоо буюу их наядаас мянга дахин их гэсэн үг. Гэвч энэ эрдэнэс нь газрын гадаргаас 145-240 км гүнд байгаа тул олборлох боломжгүй. Өнөөдрийн хүн төрөлхтний газрын гүнд өрөмдөж хүрсэн хэмжээ үүнд хүрэхгүй ажээ.
Массачусетсийн сургуулийн Дэлхий, Атмосфер, Гараг судлалын тэнхимийн судлаач Ульрих Фаул “Хэдийгээр бид олборлож чадахгүй ч бидний төсөөлж байснаас их хэмжээний алмаз эрдэнэ байдгийг тогтоолоо” гэж ярьсныг “MIT News” сонин мэдээлсэн байна. Тэрээр “Үнэндээ алмаз эрдэнэ нь тийм ч ховор зүйл биш ажээ” гэж нэмж хэлжээ.
“AFP” агентлагийн мэдээлснээр, хэдэн квадриллион тонн алмаз байгааг газрын гүнд дууны долгион хэр хурдтай тархаж байгааг хэмждэг сэйсмик технологийн тусламжтай олж илрүүлсэн байна.
Эрдэмтэд газрын гадаргын дээд талд байдаг тектоник хавтангуудын дор дэлхийн чулуулгын хамгийн хөгшин, хөдөлшгүй хэсэг байдаг. Тархсан долгион газрын дээд давхаргыг нэвтэлсний дараа хурд нь огцом нэмэгдэн цааш дамжиж байгааг илрүүлээд, учрыг нь тайлахын оролдож эхэлжээ. Улмаар ямар материалын дундуур дууны долгион ийм хурдтай дамжиж болохыг туршиж үзэхэд зөвхөн алмаз байсан аж.
Дууны долгион алмазын дундуур тархахдаа газрын дээд давхаргыг нэвтлэхээс хоёр дахин хурдтай байжээ. Эдүгээ эрдэмтэд газрын гүнд өмнө төсөөлж байснаас доод тал нь 1000 дахин их алмаз эрдэнэ байгаа гэж дүгнэж байгаа аж.
Алмаз нь газрын гүн дэх өндөр даралт, өндөр температуртай орчинд нүүрстөрөгчөөс бий болдог. Бий болсон алмаз нь галт уулын дэлбэрэлтээр газрын гадарга дээр бага хэмжээтэй хэдэн арван сая жил тутамд нэг удаа гардаг байна.