Монгол Улсын Засгийн газар, Герман улсын Олон улсын хамтын ажиллагааны нийгэмлэгтэй, Хөдөлмөр, нийгмийн хамгааллын яамтай хамтарсанүндэсний зөвлөгөөн хоёр дахь өдрөө үргэлжилж байна.
Мэргэжлийн боловсрол сургалтын салбар Монгол Улсын хөгжлийн хөдөлгөгч хүч болсон мэргэжилтэй, ур чадвартай боловсон хүчнийг бэлтгэдэг голцөм учраас Засгийн газраас энэ салбарт онцгой анхаарал хандуулан “Мэргэжлийн боловсрол сургалт-Ажилсаг Монгол” үндэсний зөвлөгөөнийг санаачлан зохион байгуулж буй юм.
Зөвлөгөөний өнөөдрийн арга хэмжээнд “Мэргэжлийн боловсрол сургалт-Ажилсаг Монгол” үндэсний зөвлөгөөнийг Төрийн ордонд Монгол Улсын Ерөнхий сайд У. Хүрэлсүх, УИХ-ын, Засгийн газрын гишүүд оролцож мэргэжлийн байгууллагын багш судлаачид, ажил олгогчид, оюутан суралцагчид, олон улсын байгууллагынхантай хамтран салбарын бодлогын талаар хэлэлцсэн.
Нээлттэй өдөрлөгт “Техник технологийн политехник коллеж”, “Герман-Монголын МСҮТ”, “Хөдөлмөрийн аюулгүй байдал, эрүүл мэндийн төв”, “Төв аймаг дахь Эрдэнэ МСҮТ”, “Ражив Гандийн нэрэмжит үйлдвэрлэл урлалын политехник коллеж” гэх зэрэг 92 албан байгууллагууд оролцсон Хөдөлмөрийн биржийн үйл ажиллагаа зохион байгуулагдсан. Өдөрлөгт МСҮТ, политехник коллежууд өөрсдийн бүтээсэн бүтээлийн үзэсгэлэнг, суралцагчдын авъяас чадвар, өөрсдийн сургуулиа сурталчиллаа.
“Ажилсаг Монгол” хөтөлбөрийг санаачлагч УИХ-ын гишүүн Д.Тэрбишдагва: “Манай улсад ерөнхий боловсролын сургууль төгсч байгаа хүүхдүүдийн 80 хувь нь их, дээд сургуульд орж байгаа ч төгсөөд 79 хувь нь мэргэжлээрээ ажиллаж чадахгүй байгаа бөгөөдүйлдвэрт нарийн мэргэжлийн боловсон хүчин дутагдалтай байгаа юм. “Мэргэжлийн боловсрол-Ажилсаг Монгол” хөтөлбөрийн хүрээнд 2030 хүртэл 30 мянган залууг өндөр мэргэжлийн боловсон хүчин болгож бэлтгэнэ.үүний үр дүнд үйлдвэр аж ахуйн газрууд хөгжинө” хэмээв.
Тус өдөрлөгт Хөдөлмөр, нийгмийн хамгааллын дэд сайд С.Мөнгөнчимэг, Герман улсын нэгдүгээр нарийн бичгийн дарга Кристиан Гласс тэргүүтэй Герман улсын төлөөллүүд, Налайх дүүргийн засаг дарга зэрэг албан хүмүүс оролцсон юм.
Ц. УЯНГА
