Уржигдар жүжигчин Меган Маркл, ханхүү Харри нарын хуримын ёслол Виндсорын шилтгээн дэх Гэгээн Жоржийн сүмд сүр дуулиантай болсон билээ. Энэхүү хуримын ёслолд сүйт бүсгүй хараа булаам цасан цагаан өнгийн даашинз өмсөж, гурван метр урт торон гивлүүр зүүсэн байв. Түүний даашинзыг Givenchy загварын ордны урлаачид бүтээсэн бөгөөд даашинзанд өчүүхэн ч сэв суулгахгүйн тулд тун болгоомжтой ажилласан гэнэ.
Энэхүү даашинзыг урласан Givenchy ордны загвар зохион бүтээгч Слэйр Вэйт Келлер “Ажилчид даашинзыг маш чамбай оёхын тулд 100 гаруй цагийг зарцуулсан. Мөн материалыг нь сэвтээхгүй цэвэрхэн чигээр нь байлгахын тулд 30 минут тутамд гараа угааж байсан. Учир нь, хүний гар тодорхой хугацаанд тос ялгаруулж байдаг. Тиймээс хэрвээ чи маш тансаг, хээнцэр, гоёмсог материалтай харьцаж байгаа бол дээд зэргээр ариун цэврийг сахих ёстой. Ялангуяа уран хатгамал хийж байгаа тохиолдолд бол гар чинь маш цэвэрхэн байх ёстой” хэмээжээ.
