Монголын Хөл Бөмбөгийн Холбоо өнгөрсөн жил “Үндэсний дээд лиг”-ийн нээлтийн үеэр урлаг, спортын одод оролцсон “Оддын хөлбөмбөг” тэмцээнийг анх удаа зохион байгуулсан билээ.
Тэгвэл дөрөвдүгээр сарын 23-ны өдөр буюу Даваа гарагт Дэлхийн Аварга Шалгаруулах Тэмцээний цом Монголд анх удаа ирэх өдрийг тохиолдуулан “Оддын хөлбөмбөг” тэмцээнийг дахин хийх гэж байна. Энэ удаад Монгол улсад Олимпийн наадмын анхны алтан медалийг авчирч байсан Монгол Улсын Хөдөлмөрийн баатар Н.Түвшинбаяр, МУГТ Э.Бадар-Ууган нар хоёр багийг ахалж, ерөнхий дасгалжуулагчдаар СТА Н.Онон, МУГЖ Г.Золбоот нар ажиллана.
Тухайн өдөр тэмцээн 10:00 цагт эхлэж “Оддын хөлбөмбөг”-ийн араас 11:00 цагт ДАШТ-ий цом МХБХ-ны ногоон талбайд орж ирэх бол 12:30 цагаас Эрчим – Улаанбаатар Сити клубүүд Супер цомын төлөө тоглоно.