АТГ-ын дэргэдэх олон нийтийн зөвлөлөөс “Авлигачдыг илчлэхэд албан тушаалтнуудаас айх хэрэггүй боллоо” сэдэвт хэвлэлийн хурал хийлээ.
Энэ үеэр Олон нийтийн зөвлөлийн дарга Г.Баасан ярихдаа: Монгол Улсын Ерөнхийлөгч 38 тоот зарлиг гаргаж, 2018-2019 оныг Авилгаас татгалзах, илчлэх, авилгын гэрч, хохирогчийг хамгаалах жил болгон зарласан. АТГ-ын дэргэдэх ОНЗ нь авилгыг таслан зогсоох ард иргэдийн индэр болж ажиллахаа мэдэгдэж байна. Авилгыг илчлэх, гэрчлэх, мэдээлэх хөдөлгөөнийг Монгол орон даяар өрнүүлж байгаа. Монгол Улсын авилгын цар хүрээ ямар хэмжээнд байгаа талаар олон улсын байгууллагын дүн шинжилгээ гарсан. Аймаг, дүүрэг, сум, хороо, баг, хэсэг, төрийн албан байгууллага бүрт авлига авч байгаа, албан тушаалтан дур зоргоороо авирлаж, хууль зөрчиж, дарамт шахалт үзүүлж байгаа үйлдлүүдийг илчлэх, мэдээлэх, авилгатай тэмцэх сайн дурын бүлэг байгуулан ОНЗ-д бүртгүүлж,хамтран ажиллахыг уриалж байна. Бид хүчээ нэгтгэж байж авилгыг зогсооно. Олон нийтийн зөвлөлд хүмүүсээс гомдол их ирсэн. Авилгал, хууль зөрчсөн үйлдлүүдийг хянаж өгөөч гэсэн гомдол ирсэн. Одоогоор Зорчигч тээврийн нэгтгэлийн даргыг яллагдагчаар татсан боловч ажлаа хийсээр байгаа гэлээ.
Олон нийтийн зөвлөлийн гишүүн, улс төр судлаач А.Саруул ярихдаа: Манайд авилга үндэсний аюулгүй байдлын хэмжээнд очсон. АТГ 14 тэрбумын төсөвтэй ч ажлаа хийхгүй байна. Авилгыг илчилсэнээр нэр хүнд гутаасан гэх хэрэгт өөрөө мөрдөгддөг. Мэдээлэгч, гэрч хүмүүс хохирогч болдог. Авилгын эсрэг хууль хэн ч тоодоггүй цаас. Гэрч хохирогчийг хамгаалах хууль хэрэгждэггүй. Хэрэгжүүлэхийн тулд өнөөдөр гэрч мэдээлэгчийг хохирогч болгохоо боль хэмээн АТГ-т шаардлага тавина гэв.
Авилгатай тэмцэх бүлэг, бүлгэмээс ирүүлсэн авлигын шинжтэй мэдээлэл, албан тушаалтны бусармаг үйлдэл бүрийг тогтмол сонорт хүргэж, авилгад өртөж буй төрийн албан хаагчийг нээлттэй зарлаж, холбогдох хариуцлагыг шуурхай шийдвэрлүүлэх үр дүн шаардаж ажиллана гэдгээ дурдав.
Б.НОМИН-ЭРДЭНЭ