МАХН, МҮАН, ИЗНН болон Ногоон намын удирдлагууд Оюу толгойн гэрээг цуцлах үндэслэлийг танилцууллаа. Энэ үеэр ИЗНН-ын дарга Ц.Ганхуяг “Оюутолгойн гэрээг цуцлах үндэслэлийг бид танилцуулж байна. “Оюутолгой” компани нөөцөө шинэчлэн тогтоосон байна. Өнөөдрийн ханшаар зэс 289.3 тэрбум ам.долларын үнэд хүрэхээр байна. 97.6 тэрбум ам.долларын алт, зургаан тэрбум ам.долларын мөнгө, 5.1 тэрбум ам.долларын молебдин гэж тооцохоор байна. Энэ мөнгийг нэгтгээд монголын хүн амын тоонд хуваавал нэг хүнд 132 мянган ам.доллар ногдохоор баялаг энд байна. Монгол Улс өөрийн 34 хувийг гадаадын компаниас зээлсэн. “Оюутолгой”-н гэрээнээс борлуулалтын хувь орж ирэхгүй байгаа төдийгүй алтаа Монголбанкинд тушаахгүй байгаа зэрэг олон асуудлыг энд дурьдаж болно. Монголын тал өнөөдөр баялгаа шавхагдан дуустал захиран зарцуулах эрхгүй болсон.
Ногоон намын дарга О.Бум-Ялагч, “Оюутолгойн гэрээг луйврын гэрээ болсон хэмээн эсэргүүцэж байсныг санаж байгаа байх. Хамгийн эмзэглэж байсан асуудал бол усны нөөцийн асуудал юм. Байгаль орчны үнэлгээ хийгээгүй. Арав дахин бага усны нөөцтэй яаж үйл ажиллагаа явуулах юм бэ гэдэг асуудалд өнөөдрийг хүртэл тайлбар өгөөгүй. Байгаль орчны үнэлгээний дагуу усны нөөцөө тодорхой болгооч. Тодорхой болгох хүртэл үйл ажиллагааг нь зогсоох хэрэгтэй.
МАХН-ын дарга Н.Энхбаяр, “Оюутолгойн гэрээг ийм муу гэрээ хийж болохгүй гэж би байр сууриа илэрхийлж байсан. С.Баяр, С.Баярцогт нарт би хэлж байсан. Харамсалтай нь зүтгэсээр байгаад энэ гэрээг байгуулж байсан. “Оюутолгой”-д 400 тэрбум ам.доллараар хэмжигдэх баялаг байна. Монголд ямар ч ашиггүй гэрээ болсон. Монголын газар нутагт байгаа баялгийг эдийн засгийн эргэлтэд оруулахдаа өөрсдөө өртэй болчихсон. Үндсэн Хуулийн 6.1-ийг зөрчсөн. Үүнийг УИХ санаатайгаар хуйвалдаж өөрсдийнхөө хувийг 34 хувь байна гэж луйврын гэрээ байгуулах суурийг нь тавьж өгсөн байгаа юм. УИХ Засгийн газартайгаа хуйвалдаж Монгол ашиггүй гэрээний хууль эрхзүйн орчинг нь бүрдүүлж өгсөн. Дубайн гэрээ гээд 2037 он буюу ногдол ашгийн гэрээг 27-29 жилийн дараа авахаар болчихоод байна.
МҮАН-ын дарга Б.Цогтгэрэл “2009 оны 9 сарын 7-ны өдөр “Оюутолгой”-н гэрээг байгуулж байсан ажлын хэсэгт 34 заалт бүхий шаардлага хүргүүлж байсан. Өнөөдөр нэг ч заалтыг биелүүлээгүй. Өнөөдрийг хүртэл энэ гэрээтэй холбоотой маргаан гардаг. Маргаан гарах бүрт монголд ашиггүй шийдвэр гаргадаг. Арваад жилийн дараа харахад энэ гэрээ бол хөрөнгө оруулалтын гэрэээ биш байж. Рио Тинто хөрөнгөө оруулаад 34, 66 хувиараа хамтраад ажиллая гэсэн биш мөнгө олж өгөх, зээл олж авах гэрээ болж хувирчээ” гэв. Иймд Оюутолгойн гэрээг эргэн харах, цаашлаад цуцлах хүртэл арга хэмжээг авах шаардлагатай хэмээн онцоллоо.