Швейцарийн хуулийн байгууллага өөрийн улсын банкин дахь нийтдээ 1.85 сая ам.долларын үлдэгдэлтэй данснуудыг царцаасан талаар “Ройтерс” мэдээллээ. Уг мэдээлэлд “Рио Тинто”-гийн олборлолтын гэрээ байгуулахад Монгол Улсын Сангийн сайд асан дэмжлэг үзүүлсэн байж болзошгүй бөгөөд авлигын хэргийг шалгах ажлын хүрээнд дээрх арга хэмжээг авсан байна. Швейцарийн Ерөнхий прокуророос С.Баярцогт өөрийн дансуудын нэгээр “Рио Тинто”-гоос 10 сая ам.доллар авсан байж болзошгүй гэж үзэж байгаа аж. Монгол Улсын Авлигатай тэмцэх газар 2009 онд “Рио Тинто”-той С.Баярцогтын байгуулсан хөрөнгө оруулалтын гэрээг шалгаж байгаа бөгөөд гэрээ байгуулсны дараа “Рио Тинто” компани “Оюу Толгой” төслийг эхлүүлсэн.
Мэдэгдэлд “Гадаад орны засгийн газрын сайдын албан тушаалд дөнгөж томилогдсон хүн ийм их хэмжээний мөнгө хүлээн авсан нь сэжигтэй байгаа төдийгүй Сангийн сайд байхдаа Баярцогтын гарын үсэг зурсан гэрээ Монголын талд хохиролтой байж магадгүй байдал ажиглагдаж байна” гэжээ. 2008 оны есдүгээр сард буюу С.Баярцогтыг Сангийн сайдаар томилогдсон үед түүний нэрийн дансанд 10 сая ам.доллар шилжиж орж ирсэн байна.