Монголын шилдэг жүдочид 66 кг-ын жинд барилддаг Д.Төмөрхүлэг, Н.Дагвасүрэн (81кг), Б.Тэмүүлэн (+100) нар Арабын нэгдсэн Эмират улсын нэрийн өмнөөс тэмцээнд оролцох легонер тамирчид болж байгаа аж. Тамирчид ирэх гуравдугаар сараас гэрээ хэлцлээ дуусгаж, тавдугаар сараас тус улсын нэрийн өмнөөс тэмцээнд оролцож эхлэх бололтой.
Монголын шилдэг жүдочид гадаадад уригдсан хэд хэдэн тохиолдол бий. Тодруулбал, эмэгтэйчүүдийн 48 кг-ын жингийн шилдэг тамирчин Г.Отгонцэцэг Казахстаны нэрийн өмнөөс барилдан, олимп, дэлхийн аваргын хүрэл медаль хүртсэн бол Азербайжаны жүдо бөхийн шигшээ баг өнгөрсөн жил 48 кг-д Э.Базаррагчаа, 52 кг-д П.Буянхишиг, 57 кг-д М.Ичинхорлоо нартай албан ёсоор гэрээ байгуулж тэмцээн уралдаанд оролцож байгаа билээ.
