НИТХ дахь МАН-ын бүлгээс Сонгинохайрхан дүүргийн Эрүүл мэндийн төв болон дүүргийн 31 өрхийн эмнэлэгт 36 агаар цэвэршүүлэгч бэлэглэв.
Агаар цэвэршүүлэгч МАН-ын бүлгийн дарга С.Мөнхчулуун гардуулсан юм. Агаар цэвэршүүлэгч нь тасгийн дотоод орчны агаарын чанарыг сайжруулж, томуу, томуу төст өвчний улмаас хэвтэн эмчлүүлж буй өвчтөний эдгэрэлтэд нөлөө үзүүлэх чухал ач холбогдолтой юм гэдгийг Сонгинохайрхан дүүргийн Эрүүл мэндийн төвийн удирдлагууд онцолж байлаа.
Дашрамд дурьдахад Засгийн газрын тогтоолоор нийслэлийн агаарын чанарыг сайжруулах 1, 2-р бүсэд орших сургууль, цэцэрлэгийн анги танхим, эмнэлэгийн хүүхдийн тасагт нийт 5270 агаар цэвэршүүлэгч олгох ажлыг өнгөрсөн оны 12 дугаар сарын 21-нээс эхлүүлсэн. Одоогийн байдлаар 125 цэцэрлэг, 103 сургуулийн анги танхим, 12 эмнэлгийн хүүхдийн тасаг, 4 асрамжийн газарт нийт 3792 агаар цэвэршүүлэгч нийлүүлжээ.
Мөн Дэлхийн банк болон нийслэлийн санхүүжилтээр хэрэгжиж байгаа “Улаанбаатар-Цэвэр агаар” төслийн хүрээнд Нийслэлийн Эрүүл мэндийн газрын харъяа 13 эмнэлэг, 142 өрхийн эрүүл мэндийн төвд нийт 462 дотоод орчны агаар цэвэршүүлэгч төхөөрөмж олгоод буй юм.