Европын Холбооны гишүүн орнуудын Сангийн сайд нарын зөвлөл өнөөдөр хуралдаж “Татварын асуудлаар хамтран ажилладаггүй орнуудын жагсаалт”-аас Монгол Улсыг гаргахаар шийдвэрлэжээ. Сангийн сайд нарын зөвлөл 2017 оны XII сарын 5-ны хуралдаанаараа уг жагсаалтад Монгол Улсыг оруулаад байсан юм. Монгол Улсын Засгийн газар 2017 оны XII сарын 20-ны өдрийн 350 дугаар тогтоолыг баталж татварын асуудлаарх сайн засаглалын зарчмуудыг хоёр жилийн хугацаанд хэрэгжүүлэх үүргийг хүлээr тус хар жагсаалтаас гарлаа. Монгол Улсын Засгийн газар хар жагсаалтаас гарах асуудлыг шийдвэрлэхийн тулд тодорхой арга хэмжээ авч ажилласан бөгөөд Гадаад харилцааны сайд Д.Цогтбаатар тушаал гарган Тусгай үүрэг гүйцэтгэгч Элчин сайдыг томилох, Сангийн яам болон ХЗДХЯ-ны төлөөллийг багтаасан Ажлын хэсэг байгуулан ажиллуулах зэрэг ажлуудыг хийсэн билээ. Мөн Европын Холбооны Дээд төлөөлөгч бөгөөд Европын комиссын Дэд ерөнхийлөгч Ф.Могерини болон Европын Холбооны гишүүн 28 улсын Гадаад хэргийн сайд нарт албан захидал илгээн, Европын Холбооны гишүүн улсын Элчин сайд нартай уулзаж Монгол Улсын байр суурийг тайлбарлах зэрэг олон арга хэмжээ авсан юм.