Энэ сарын 15-ны өдөр “Монгол Улсын Филармон-45” баярын концерт болно. Симфони найрал хөгжим, Баянмонгол жааз найрал хөгжим, Морин хуурын чуулга, дуучид гээд 160 гаруй уран бүтээлчдийг багтаасан Улсын Филармон ойн баярын концертын талаар өнөөдөр мэдээлэл хийлээ.
БНМАУ-ын Соёлын яамны 1957 оны 06-р сарын 05-ны өдрийн 118 тоот тушаалаар Монголын Радио Хорооны дэргэд Симфони найрал хөгжим байгуулагдсан байдаг. Ингэснээр Улсын Филармоны үндсэн суурь тавигдаж, улмаар БНМАУ-ын Сайд нарын зөвлөлийн 1972 оны 07-р сарын 20-ны өдрийн 283 тоот тогтоолоор Мэдээлэл, Радио Телевизийн улсын хорооны “БаянМонгол” жааз найрал хөгжим, Улсын Ардын Дуу Бүжгийн Чуулгын “Соёл Эрдэнэ” дуу хөгжмийн хамтлагийг нэгтгэн АЖ, ТШ Ц.Намсрайжавын санаачилгаар Монгол Улсын Филармоныг зохион байгуулсан байдаг байна.
Монгол улсын Филармон нь “Симфони Найрал Хөгжим”, “БаянМонгол” жааз найрал хөгжим, “Морин Хуурын Чуулга”-ыг эгнээндээ нэгтгэсэн 180 гаруй уран бүтээлч, ажилтан албан хаагчидтай концертын томоохон байгууллага бөгөөд жилд өөрийн болон Олон Улсын тайзнаа 100 гаруй тоглолт, арга хэмжээг зохион байгуулдаг билээ.
“Монгол Улсын Филармон-45” баярын концертын талаар МОНХ Албаны дарга Т.Алтан-Од “Энэ удаагийн “Монгол Улсын Филармон-45″ баярын концерт дундаа завсарлагатай хоёр цаг үргэлжлэх ба өвөрмөц дуугаралт, гайхамшигтай орчин, шинэ хэв маягийн тайз засалт мэргэжлийн уран бүтээлчдийн сэтгэл сэргээм тансаг хөг аялгууг танд мэдрүүлж, мартагдашгүй дурсамжийг үлдээх болно” гэлээ.
Тоглолтод өөр өөр, төрөл жанр, дуугаралт бүхий мэргэжлийн 180 гаруй гаруй уран бүтээлчид нэгэн тайзнаа цуглах тус тоглолтод Улсын Филармоны Симфони найрал хөгжим Удирдаач Д.Нямдаш /СТА/, Б.Батбаатар /СТА/ Баянмонгол жааз найрал хөгжим Удирдаач Б.Ганбат /МУУГЗ/, Б.Нямдорж /МУУГЗ/, С.Саруул-Од /СТА/ Морин хуурын чуулга Удирдаач Д.Түвшинсайхан /СТА/, Н.Жигжиддорж /СТА/ Улсын Филармонийн гоцлол дуучин С.Эрдэнэцэцэг /МУГЖ/, Б.Мөнхбаатар /МУГЖ/ С.Баттулга /СТА/, Н.Наранбаатар /СТА/ Ц.Хулан /СТА/ Л.Насанбуян /СТА/, Б.Дэлгэрбаяр /СТА/, Т.Отгонбаяр, Б.Монголхүү нар оролцох аж
Мөн урилгаар ДБЭТ-ын дуучин С.Мөнгөнцэцэг /МУГЖ/, Ш.Наранчимэг /СТА/, Б.Энхнаран, Никитон хамтлагийн дуучин Б.Батчулуун /МУУГЗ/, Номин Талс-т хамтлагийн дуучин Т.Дэлгэрмөрөн /СТА/ нар оролцохоор болсон байна.
Дашрамд сонирхуулахад тоглолтын тасалбарыг Улсын Филармоны тасалбарын касс болон онлайн худалдаа https:/www.ticket.mn-ээс авч болох бөгөөд unitеl-ийн хэрэглэгчид 100 GG оноогоор 5000 төгрөг хөнгөлүүлэн авах боломжтой. Дэлгэрэнгүй мэдээллийг: 7011-8012. 8800-4849. 9919-6623 дугаараас тодруулна уу.