Эрүүл мэндийн дэд сайд асан Ж.Цолмон “Цагийн зурвас” номоо өлгийдөн авч, уншигчдын гарт хүргэж байна. Хөл хөдөлгөөн ихтэй, хурсан зочид зохиолчид баяр хүргэн сэтгэлийн үгээ дэлгэсэн халуун дотно уур амьсгалтай нэгэн номын нээлт МУИС-ын Номын санд болж өндөрлөв. Нээлтийн үеэр зохиолч Ж.Цолмоноос номын талаар тодрууллаа.
-Цагийн зурвас гэх шинэ номын нээлт хийж байна. Өөрийн номын утгыг уншигчдаа зориулан товчлон яривал?
-Номоо Монгол улсын социализмын үе, ардчилсан нийгмийн 25 жил буюу хагас зууны Монгол улсын хөгжил дэвшил болоод дэлхий нийтийн томоохон үйл явдлуудыг бодит хүний амьдрал дээр тулгуурлан бичсэн. Нөгөө талаар өөрийн амьдралынхаа бүхий л цаг үеийг харуулж, өнөөдрийн намайг бий болгоход тусалсан бүх л хүмүүс болон нийгмийг харуулахыг зорьсон. Энэ номыг бичих явцад өөрийн амьдралын хуудас болгоныг ухрааж, өөрийн ой санамжид байгаа зүйлсийг гаргаж бичлээ. Надад чухал гэж бодогдсон төдийгүй монголын ард түмний нийтлэг ой санамжид тогтсон нийгэм, эдийн засаг, улс төрийн үйл явдлуудыг харуулахыг хичээлээ. Цаг хугацаа гэдэг бол ухрааж болдоггүй, цагийн дундуур орж болдоггүй, цаг ар араасаа хөврөн явдаг. Энэ цаг хугацаа хэзээ дуусахыг бид мэдэхгүй ч бид тэр цаг хугацааны нэгээхэн хэсэгт амьдарч байгаа жижигхэн зурвас юм. Тийм учраас энэ номоороо дамжуулан өнөө үеийн түүхийг жижигхэн зурвасаар хойч үедээ бичиж үлдээж байгаа юм. Бас нэгэн онцлог бол “календарчилагдсан жанраар бичигдсэн” явдал билээ.
-“Миний болон орчин үеийн монголын хроник” номыг бүтээхэд хэр хүндрэлтэй байсан бэ?
-Миний хувьд ийм бүтээлийг бүтээж байгаагүй. Мэргэжлийнхээ дагуу ном бүтээх гэж оролдож байсан. Энэ том ертөнцөд хөл тавин гэдэг бол маш их хариуцлага юм. Иймээс надад зөвшөөрөл хэрэгтэй байсан. Хэдийгээр номыг би бичсэн ч гэсэн тухайн ном нь хүмүүст хэрэгцээтэй юм үлдээж чадах нь уу? Гэдэг нь маш чухал байсан. Тиймээс Монгол Улсыг цогцлооход гол үүрэг гүйцэтгэсэн, хариуцлагатай, нэрийн хуудас нь болж явсан хүмүүсээр номоо уншуулсан. Жишээлбэл Монгол Улсын Соёлын гавьяат зүтгэлтэн ахмад дипломатч, Гадаад харилцааны сайд асан Ц.Гомбосүрэн, МУ-ын эрүүл мэнд, боловсролын С.Дамбаа, БШУСЯ-ны сайд асан Чулуунбаатар, МУ-ын арван тав дахь Ерөнхий сайд Гунгаадорж нар номыг уншаад, хэвлүүлэх зөвшөөрөл өгсөн учраас номоо хэвлүүлээ.
-Номоо туурвихад хэр их хугацаа зарцуулж бичив?
-Энэ номыг эхлүүлээд дөрвөн жил болж байна. Барьж бол 99 хоног бичсэн. Олон хүмүүсийн сэтгэл зүтгэлээр бүтсэн. Гэгээн зурвас, нандин зурвас, эрхэм зурвас гэх гурван бүлгээс бүрдсэн 640 хуудастай номоо өлгийдөн авлаа. Уг номыг бүрэн эхээр нь гаргасан бол мянгаад хуудастай болох байлаа. Мөн номд 650-аад улс төрчдийн нэрийг багтаасан. Номоо индекстэй гаргая гэж бодсон боловч нэгд индекс нь 100 гаруй хуудас болох байсан учир илүү зузаан ном болно,хоёрдугаарт цаг хугацаанд давчигдаад индексээ гаргаж чадсангүй. Дараа дараагийн номдоо индексээ оруулах болно гэв.
Номын нээлтэд МУСТА, поп дива дуучин С.Наран уран бүтээлээсээ ая дууны мэндчилгээ өргөсөн юм. Ж.Цолмон, дуучин С.Наран хоёр нь ах дүүгийн хүүхдүүд ажээ. Мөн нээлтийн дундуур зохиолч Ж.Цолмон ийнхүү шүлгийн мялаалга уншиж байсан юм.
Алд биеийг минь төрүүлсэн аав ээждээ мөргөмүй
Эрдэм мэдлэгийг олгосон ачит багшдаа мөргөмүй
Энэ бүгдийг олгож буй ахуй төрдөө мөргөмүй
Амьдрал үргэлжилнэ, энэ ном бас үргэлжилнэ… хэмээсэн юм.
Анагаах ухааны доктор, профессор Ж.Цолмоны аав МЗЭ-ийн гишүүн, зохиолч, яруу найрагч З.Жадамба өөрийн сэтгэлийг хуваалцсан юм. Тэрээр “Охины минь номын нээлтэд ирсэн та бүхэндээ баярлаа. Эцэг хүний сургаал гэдэг бол их хатуу. Уурламаар, гомдмоор, уйлмаар байдаг. Гэвч энэ бүхэн бол тэрний амьдралын замын зааж, шулуутгаж сайжруулж өгдөг зүйл юм. Энэ номыг хэвлэхэд хатуу үг хэлж, шүүмжилж байсан хүн нь би юм шиг байгаа юм. Тэгж дарж байгаагүй бол энэ ном гурван боть болох байсан байх.(инээв) Миний охин их зоригтой, тэвчээртэй, ухаалаг. Хар нялхаасаа л улс төрийн амьдралд зүтгэсэн. Тэр бүгдийн жоохон дарж өгдөг байсан юм гээд номын нээлтэд өөрийн шүлгийн мялаалгаас уншсан юм.
Дашрамд сонирхуулахад уншигчид маань “Цагийн зурвас” номыг бүх номын дэлгүүрүүдээс худалдаж авах боломжтой ажээ.
Б.ҮРЖИГ