Энэ сарын 11-12-нд шилжих шөнө мөрийтэй тоглоомоос болж зодолдсон 30-40 орчим насны найман залууд хэрэг үүсгэн шалгаж байгаа юм байна. Энэ хэргийг Баянгол дүүргийн Цагдаагийн I хэлтэс, Баянзүрх дүүргийн Цагдаагийн III хэлтэст шалгаж, танхайрсан этгээдүүдээс байцаалт авч эхэлжээ.
Тэд эхлээд Баянгол дүүргийн нэгдүгээр хороо олны нэршсэнээр 3,4-өөр хорооллын бичилд байрлах “Castle” диско баарны үүдэнд, дараа нь өглөөний 06.00 цагийн үед Баянзүрх дүүргийн 11 хороонд байрлах “Ривер бич” амралтын газрын үүдэнд зодолдож, хоёрыгоо хүнд бэртээсэн байна. Уг найман залуу хоорондоо зодолдоход, нэг залуу сэлэм эргүүлж танхайрсан үйлдэл нь тухайн үйлчилгээний газруудын камерт бичигджээ. Мөн зодоон хийсэн залуус “ДК” буюу Дипломат корпусын машинаас бууж ирж байгаа дүрс үлдсэн нь анхаарал татаж байгаа юм.
Эдгээр залуучуудын хоёр нь бэртэж эмнэлэгт хүргэгджээ. Үлдсэн зургаан этгээдээс хоёрыг нь цагдаа нар барьж чадаагүй, эрэн сурвалжилж байгаа аж.
Б.ҮРЖИГ