Монголын Үйлдвэрчдийн Эвлэлийн Соёлын төв ордонд Монголын багш нарын анхдугаар их хуралдаан боллоо. Энэ үеэр Багш хөгжлийн тухай хуулийн төслийг танилцуулав.
Хуралдаанд 21 аймгийн багш төлөөлөгчид болон нийслэлээс нийт 991 багш мэргэжилтэн хүрэлцэн ирж оролцож байна.
Энэ талаар Булган аймгийн XIII сургуулийн нийгмийн ухааны багш П.Долгоржаваас энэ талаар тодрууллаа.
-Өнөөдөр Монголын багш нарын анхдугаар онц их хурал болж байгаад байна. Энэ хуралдаанаар бид мянга мянган гишүүдийнхээ цалин хөлсний асуудлаар болон багшийн хөгжлийн хуулийн талаар ярилцаж байна.
Боловсролын салбарын талаар асуудал тэдгээрийн гол цөм болсон багш нарын цалин хөлс, орон сууц, тэтгэвэр тэтгэмж, зээлийн асуудал гэх мэтчилэн маш олон зүйлийн талаар тойрч ярилаа.
-Эдийн засгийн хямралтай байгаа энэ үед багш, эмч нар цалингаа нэмүүлэхийг шаардаж байгаа нь цаг үеэ олсонгүй гэж зарим нь үзэж байна. Энэ хэр цаг үеэ олсон шаардлага гэж бодож байна вэ?
-Энэ бол цаг үеэсээ хоцорсон асуудал гэж үзэж байна. Гурван жилийн хугацаанд цалин хөлс нэмсэнгүй. Үүний цаана худалдан авах чадвар, бүтээмжийн талаарх асуудал давхар яригддаг.
Улс орны нөхцөл байдал хэцүү байгаа нь үнэн. Ийм замбараагүй нөхцөл байдлыг хэн бий болгосон юм бэ? Зээл тусламж аваад замбараагүй, хариуцлагагүй зарцуулсан нь төр засаг өөрөө.
–Цалин нэмүүлэх шаардлагыг Засгийн газар хүлээж авахгүй бол яах вэ?
-Бид цалингаа нэмүүлтлээ жагсаалаа үргэлжлүүлсээр, ажил хаях болно. Үнэндээ боломж бололцоо байгаа гэдгийг зарим улс төрийн түшээд өөрсдөө хэлсэн. Боломж бололцоо хайж олох ёстой болохоос боломжгүй зүйл ярих нь зүйд нийцэхгүй.
-Онц их хурлаар Багшийн хөгжлийн хуулийг хэлэлцсэн гэсэн үү?
-Хуулийг зөвхөн УИХ дангаараа шийддэггүй. Үүнийг бүх нийтээрээ шийдэх учиртай. Багш хөгжлийн тухай хуулинд багш нар саналаа өгөх эрхтэй. Хуулийг бид дахин өргөн барина. Энэ хууль хараахан батлагдаагүй байгаа. Тиймээс энэ хуралдаанаар олон нийтээр хэлэлцүүлж багш нар бид санал бодлоо нэмэлтээр оруулна. Багш хөгжлийн тухай хуулийг намрын чуулганаар УИХ-д өргөн барина.
-Танай зарим багш энэ хуулинд дэмжихээргүй зүйл бас байна гэсэн?
-Багшийн хөгжлийн тухай хууль ярингуутаа торгууль, шийтгэлийн тухай зүйл заалт оруулж ирсэн байна. Жишээлбэл: багш нар ёс зүйн алдаа гаргавал цалинг нь хасна гэх мэт. Үүнийг заавал Багшийн хөгжлийн тухай хууль руу оруулах шаардлагагүй. Энэ бол Зөрчлийн тухай хуулиар шийдвэрлэсэн зүйл. Мөн багш нарын бодит байдалд нийцэхээргүй зүйл заалт байсан гэв.
Б.ОЮУНЖАРГАЛ