Цагдаагийн байгууллагын ажил мэргэжлийн шилдэг алба хаагч шалгаруулах “Хэсгийн байцаагч-2017” тэмцээн энэ сарын 20-22-ны өдрүүдэд Төв аймгийн Зуунмод суманд амжилттай болж өндөрлөлөө.
Цаг агаарын хүнд нөхцөлд цагдаагийн алба хаагчийн тэсвэр хатуужил, ур ухааныг сорьж, гурван өдөр үргэлжилсэн энэхүү тэмцээний ялагч, шилдэг хэсгийн байцаагчаар нийслэлийн Чингэлтэй дүүрэг дэх цагдаагийн нэгдүгээр хэлтсийн хэсгийн байцаагч, цагдаагийн дэслэгч Б.Батболд шалгарлаа.
Оюун ухаан, ур чадвар, албаны бэлэн байдал, хувь хүний хариуцлага, ажил мэргэжлийнхээ шилдэг нь гэдгээ харуулсан тэрбээр өргөмжлөл, алтан медаль, дурсгалын цом, иж бүрэн компьютер, унадаг дугуйгаар шагнуулав.
Тэмцээний хоёрдугаар байрт Хэнтий аймаг дахь Цагдаагийн газрын хэсгийн байцаагч, цагдаагийн дэслэгч Г.Хатанбаатар, гутгаар байрт Төв аймаг дахь Цагдаагийн газрын хэсгийн байцаагч, цагдаагийн дэслэгч С.Цэдэндорж шалгарсан юм.
“Хэсгийн байцаагч-2017” тэмцээнд 21 аймаг, нийслэлийн 9 дүүргийн цагдаагийн газар, хэлтсээс шалгарсан шилдэг 38 хэсгийн байцаагч хууль, эрх зүй, гадаад хэл, компьютерийн мэдлэг, эсээ бичлэг, цагдаагийн алба хаагчийн бие бялдрын бэлтгэлжилт, албаны галт зэвсэг хэрэглэх, автомашин, мотоцикль жолоодох ур чадвараараа өрсөлджээ.
Цас, бороо холилдон орж, цасан шамарга шавхуурдсан намрын хүйтэн өдөр тэсвэр хатуужил, ур чадвар сорьсон хүндхэн даалгавруудыг гүйцэтгэх хүдэр чийрэг эрчүүдийн дунд ганцхан эмэгтэй алба хаагч өрсөлдсөн нь Дундговь аймаг дахь Цагдаагийн газрын хэсгийн байцаагч, цагдаагийн ахлах дэслэгч Д.Цэвэлмаа. Өнгөрсөн жилийн тэмцээнд гутгаар байр эзэлж байсан тэрбээр энэ удаа нийлбэр онооныхоо жагсаалтаар долоодугаарт оржээ.
Цагдаагийн ахлах дэслэгч Д.Цэвэлмаа “Тэмцээндээ оролцох нь чухал. Гэхдээ бид нэгэн дор цуглаж, ажил, албаныхаа болж бүтэх зүйл, эерэг тал басхүү тулгамдсан асуудал, түүнээ шийдэх арга, сайн туршлагыг нэгээсээ мэдэж, санаа бодол, санал дүгнэлтээ ярилцаж байгаа нь хамгийн олзуурхууштай” гэж ярьлаа