Нийслэлийн иргэдийн төлөөлөгчдийн хурлын дарга Ц.Сандуй албан тушаалаасаа чөлөөлөгдөх хүсэлтээ илэрхийлсэн. НИТХ-ын даргаас гадна Нийслэлийн намын хорооны дарга гэсэн улс төрийн том албан тушаал суларсан гэж хэлж болно. Хэн дарга болох вэ гэсэн яриа таамаг нийслэлийнхний дунд байна. Ирэх долоо хоногт Нийслэлийн иргэдийн төлөөлөгчдийн хурлын тэргүүлэгчид хуралдах гэнэ. МАН-аас сонгогдсон 11 төлөөлөгч багтдаг бөгөөд тэд тэргүүлэгчдийн хурлаараа НИТХ-ын хуралдаан буюу чуулганаа хийх хуралдааны товыг тогтооно. НИТХ-ын нэгдсэн хуралдаанаар НИТХ-ын шинэ даргыг томилох нь бололтой. Тэгээд ч дэгээрээ сар бүрийн сүүлийн долоо хоногийн пүрэв гаригт НИТХ-ын ээлжит хуралдааныг явуулдаг. Нийслэлийн тэргүүлэгч 11 гишүүн хурлаа яаралтай хийх хэрэгтэй гэж үзвэл наана нь хурал болох магадлалтай. Гэхдээ засаг огцорчихоод бужигнаанатай байгаа үед Нийслэлийн асуудлыг яаран шийдэхгүй нь бололтой. Тэгэхээр есдүгээр сарын 28-ны пүрэв гаригт болох НИТХ-ын ээлжит нэгдсэн хуралдаанаар НИТХ-ын даргыг сонгох нь бараг тодорхой болжээ.
Б.ОДМАА